Tata Indian Premier League (IPL) 2026 atan player an lilam leh tan a, a thawh khatna atan Thawhlehni khan Abu Dhabi, UAE-ah lilamna hun hi an hmang tan tawh.
BCCI chuan IPL 2026 player lilamna atan hian player hming an chhawp chhuak vek tawh a, Indian player 240 leh ram dang player 110-te an lilam dawn a ni.
He lilamna atan hian player 1,390 zet chu an inziak lut a, heng zinga 350-te chu thlan chhuah an ni a. Tuna player an thlan chhuah zingah hian India ram mi, ram tana la khel miah lo 224 bakah ram pawn player, ram tana la khel lo 14 an tel a, kuminah player la naupang si, tha si an tel thar nual dawn a ni.
Tun dinhmunah player 173-te chu an awmna tur a chiang sa tawh a, hmun awl 77 a la awm a, hei vang hian player inchuh pawh a na viau dawn a. Player pakhat chhan tanna tur hi Rs. vaibelchhe 2 niin, player 40-te chu hetiang zata chhan tan theih tura ngaih an ni.
Team hrang hrangte chuan player lilamnaah hian Rs. vaibelchhe 237 vel hman tur an nei a, Kolkata Knight Riders chu hman tur nei hnem ber an ni ang a, Rs. vaibelchhe 64.30 an nei ang.
Chennai chu hman tur neih hnem lama pahnihna an ni a, Rs. vaibelchhe 43.40 an nei a. Mumbai Indians chu pawisa hman tur nei tlem ber an ni a, Rs. vaibelchhe 2.75 chiah an nei a. Pawisa nei tlem ber dawttu chu Punjab Kings niin, Rs. vaibelchhe 11.5 an nei.
Player lilam hunah hian Cameron Green, Jamie Smith, Rachin Ravindra leh David Miller te chu thawm nei lian zual tura ngaih an ni.
Kolkata Knight Riders – Rs. vaibelchhe 64.3
Chennai Super Kings – Rs. vaibelchhe 43.4
Sunrisers Hyderabad – Rs. vaibelchhe 25.5
Lucknow Super Giants – Rs. vaibelchhe 22.95
Delhi Capitals – Rs. vaibelchhe 21.8
Royal Challengers Bengaluru – Rs. vaibelchhe 16.4
Rajasthan Royals – Rs. vaibelchhe 16.05
Gujarat Titans – Rs. vaibelchhe 12.9
Punjab Kings – Rs. vaibelchhe 11.5
Mumbai Indians – Rs. vaibelchhe 2.75