Ram leh ram inkar thil avanga hmun pawimawh tak, indona pawh a lo chhuah tawhna, India-China ramria Cho La leh Dok La pass chu Sikkim sorkar chuan vantlang tlawh theih turin khualzin hip nan a hawng thar.
Chief Minister Prem Singh Tamang-a’n a hawn nan Thawhtanni khan motorbike leh khualzin phur lirtheite chu ramri hrul pan turin Ridge Park, Gangtok atangin a vai liam a, hei hi vantlang tana hawnna inkhawm a ni nghal.
Feet 15,600-a sanga awm, Dok La-ah hian kum 2017 khan Indian leh Chinese sipaite an inep nasa hle a. Cho La hi 1967 Indo-China War-a inbeihna thlenna hmun a ni bawk.
Tamang-a chuan khualzinte tlawh theih tura Cho La leh Dok La an hawng ta chu ramria khualzin chawi kan nan leh a mi chengte khawsak tihchangkana eizawnna an neih theihna atan a ni tih a sawi.
Sorkar laipuiin Bharat Ranbhoomi Darshan (battlefield tourism initiative) a kalpuiah ramria hmun pawimawh bikte chu khualzinna thila hlawk zawka hman theih tur leh mipuite hnenah pawh a pawimawhna hrilh thar an nih theih nan remchang siamsak hi tha tih a ni.
Tamang-a hian khualzinnaa hlawkna neih an tum piah lamah sipaite huaisenna leh inpekna hlutzia hriat thara a awma ram hmangaihna rilru mipuia tuh thar leh tumna a nih thu a sawi.
Tourism department-a Additional Chief Secretary CS Rao-a chuan pass pahnihte khualzinte tana hawng tur hian thla hnih liam ta chhungin state sorkar leh Army leh sorkar laipui indawrin khualzinte him leh zalen taka an veivah theihna tur an ngaihtuah tih a sawi.
Hmasawnna ruhrel din tura hmalak mekte chu thawh zawh loh, la thawh mek tam tak la awm mah se mamawh zualpui erawh chu a awm vek tawh niin a sawi bawk.
Heng lai hmun hi khualzinten ni hnih chhung zel tlawh theih tura ruahman niin homestay leh lirthei chuan man tlawm tak, sorkarin a man a bituk sa hman tur ruahman a awm bawk tih Rao-a chuan a sawi.