Central YMA chuan YMA kumpuan ‘Ruihhlo Do’ hawnna neiin, hmalak tak tak an tum ta a, theihtawp chhuahin, branch tin pawh insangmar lehzual mawlh teh se.
Branch tinin kumthar hruaitu tur thlangin, la thlang fel lo tlem an la awm bawk a, heng hruaitu thlanchhuahte hi kumpuan chungchanga hmala hmasatu tur hruaitu an nih ang ngeiin, hlauh leh tim eih nei lovin che chhuak hlawm se la, ruihhloin kan ram thalaite min run nasat tawhzia hre chungin, theihtawp chhuah mawlh teh se.
YMA member te hian tih tak taka ke pente hi kan hria a, chutiang mite chu an hnungzui pawh kan chak thin a, nuam kan ti bawk. Inpekna thuk tak nen ruihhlo doin, kumpuan bawhzuina kawngah ke i pen tlang ang u.
Kan hriat fo angin, nitin damdawi hmansual vanga harsatna tawk tam tak damdawiinah dah luh ngaiin an awm a, chhungkaw buai tam tak an awm bawk. Ruihhlo avanga chhungkaw tam tak mangangna hi a nasa tawh tak zet a, thapui thawha kan do hi chu a ngai tawh a ni.
Ruihhlo kalkawng nia sawi fo kan nih avangin, ruihhlo tawlh kawnga inrawlh, khawsa lian tak tak pawh kan lo kawl teuh tawh a ni thei. Heng mite hi kan tlawmngai pawlte hian hlau lo se la, chhui se la, a tul angin mipui pawh min hriattir thuai thei zel se la ava tha em.
Kumpuan bawhzui kawnga tha kan thawh a, hma kan lak theuh theih nan ruihhlo do turin i insang mar zel ang u.