Health Minister Lalrinpuii’n Mizoram Universal Health Care Scheme (MUHCS) hnuaiah sorkar kum kal mekah nimin thleng khan sorkarin Rs vbc 100 leh cheng 529 a seng tawh tih a sawi a. Asian Development Bank (ADB) board-in health care atan US $ maktaduai 108 (Rs vbc 980) loan an puk tur pawh a remti tawh tih a sawi.
Thawhlehni khan Lalrinpuii hian a pisa-ah thu thar thehdarhtute kawmin a department chan pahnih – Health & Family Welfare department leh Social Welfare & Women & Child Development-in kum hnih chhunga an hmalakna hrang hrangte a sawi fiah a. Kumin April 1 atanga nimin thleng khan MUHCS hnuaiah mi 59,602 enkawl an ni tawh a. Hemi atan hian sorkarin Rs vbc 100 leh cheng 529 seng tawhin damlo zinga 68.56% hi sorkar damdawi ina enkawl an nih thu leh sorkar senso chu 43.47% chauh tih a sawi.
Lalrinpuii chuan kohhran hrang hrang damdawi inte pawhin mipui rawngbawlna a ni tih hriaa health care chungchangah sorkar hmalakna an zawm chu a lawmawm a tih thu a sawi a. Tunah hian private hospital thenkhatin zawm tum an awm mek a, tun kar chhung hian thawhhona thuthlung pawh ziah fel hman an tum tih a sawi.
Sorkar damdawi in hrang hrangte theihtawpin an thuam tha a, tun hmaa damlo enkawl ngai mang lo PHC/CHC-ah te chuan nasa takin damlo enkawl a ni ve ta tih a sawi a. District hospital hrang hrangte an lun ngaiin an lun reng a, Civil Hospital, Aizawl phei chu khum full reng ang tluka ngaih theih a nih bakah, Rs nuaih 2,058 chuang hmangin Aizawl Smart City Project kaltlangin an thuam thar a. ZMC&H chu khum 520 nei thei tura an upgrade bakah cabin an function-tir kim thei tawh a, ICU 26 chu a function vek tawh tih a sawi.
Health minister chuan sorkar hmasain health care atan ADB atanga loan lak tumin hma nasa takin an lo la tawh a; amaherawhchu, harsatna hrang hrang tawh niin hun tiam chhungin bawhzui fel theih a ni ta lo va. A project hi approval revalidate turin theihtawp chhuah a ni a. Health indicator hrang hrang tihlawhtling tura an tih chu an bawhzui zel a, MUHCS an kalpui khan a tihlawm avangin ADB leh Ministry of Finance duh danin a project hmingah pawh ‘Supporting Public Healthcare System Strengthening to Achieve Universal Health care for Mizoram’ tih a lo ni ta a. An tih tur zawng zawng an tihfel zawh hnuah October 23, 2025 khan loan negotiation neih niin ADB Board chuan December 5, 2025 khan loan, US $ maktaduai 108 (Rs vbc 980 vel) chu a lo approve ta a. He loan amount atanga 90% hi central sorkar tum tur a ni a, 10% – Rs vbc 90 vel bawr chauh hi kum 15 chhunga Mizoram sorkarin a rulh ve tur a ni tih a sawi.
A taka kal thlakna (kidney transplant) kalpui thei turin Civil Hospital, Aizawl-a an operating theatre-te pawh an buatsaih fel tawh a, Aizawl Smart City Ltd atangin Anaesthesia Work Station bakah hmanraw tul ang ang pek belh an ni tawh tih sawiin, kum thar — January atangin an Nephrologist leh puitu dangten Tagore Hospital-ah training an neih zawh hunah Aizawlah an ti ve thei dawn ta tih a sawi bawk.
Social welfare lamah ruang phurh scheme chu September, 2024 atanga hman tan niin nimin thlengin ruang 1,680 phurh nan Rs 1,75,85,602 pek chhuah a a nih tawh thu a sawi a. Ruihhlo ngaite tana an buatsaih Hulhliap Short Stay Centre chu 1st Batch atanga 6th Batch thleng hian mi 1,528 admit niin mi 937-in inenkawl hun chhung an awm tluan a. Tun thlenga senso chu Rs 2,05,00,913 niin finance atanga allocation an hmuh tawh chu Rs 2,36,63,000 a ni tih a sawi.
Jordan Centre chungchangah Public Private Partnership Mode-a kalpui a fuh zawk dawna hriat a nih avangin June 18, 2025-a Council of Ministers thukhawm chuan mi dang kuta hlan a remtihpui hnuah Presbyterian Church of India, Mizoram Synod hotute nen an inbia a, Synod Inkhawmpui rorel a pawm veleh ta a. Sorkar nen tha taka tangkawpa hlawhtling taka kalpui a nih ngei a beisei tih a sawi a. District hrang hrangah Ministry of Tribal Affairs kaltlangin de-addiction centre panga dinna tur Rs vbc 32.3597 hmuh a nih thu te, kum 2024-25 chhungin anganwadi 1,600 chu Rs nuai 1 zel senga tihchangtlun a nih thu, hmeichhia hleihlenna tuartute tluk luhna tur One Stop Centre chu district 11-ah 13 neih a ni tawh thute a sawi bawk.