Aizawl: Ni sarih awh tur Winter Festival chu Tourism Minister Lalnghinglova’n Thawhtanni zan khan Lammualah a hawng.
Tourism minister chuan, “Festival chu Mizo mipuite leh thalaite hlim tak leh thianghlim taka kan inhmuhkhawmna tur te, khualzin hip theihna tur te, keimahni leh keimahni kan intihphur tawna kan ei leh in siam te, kan kutchhuak leh kan thil neih zawrh turte, kan hralh theihna hun remchang a ni,” a ti a. Heng bakah hian Mizoram mawina, tlang, lui, ruam leh boruak thianghlimte, state dang mi te leh khawvel hmun danga miten an hmuh a an chhim ve theihna tur te a buahsaih a nih thu a sawi.
Festival chu December 15-20 chhunga hman phawt a ni ang a, ni 23-ah Christmas Parade neiin khar a ni dawn tih sawiin toursim minister chuan, parade hi Chanmari kawn atanga tan tur a ni ang a, hemi hunah hian zaithiam te, milar hrang hrangte leh mipuite kalkhawmin Christmas costume an neih ang angte inbelin Lammualah Christmas Carol a chhunzawm a nih tur thu a sawi bawk.
Minister chuan, “Christmas Parade chu kuminah keimahniin kan kal phawt ang a, nakumah hnam dangin min rawn zawm ve a ng a, tun atanga kum 5-10-ah chuan India ram state dang mai ni lo, khawvel hmun dang atanga an pan khawm theih tura buatsaih kan duh a, chutiang tur chuan hma kan la tan dawn a ni,” a ti.
Minister hian kum 2026 atana Mizoram Tourism-in Calendar an siam chu a tlangzarh nghal bawk.