Excise Minister Lalnghinglova Hmar chuan nimin khan a pisa-ah thu thar thehdarhtute a kawm a, Aizawl dai hnai — Rangvamual, Phunchawng leh Tuikhurhlua zute laboratory-ah endiktir leh a nih thu a sawi.
The Zozam Times zawhna chhangin excise minister chuan heng hmuna zute hi mihring hriselna tana a hlauhawm dan hriat chian a nih theihna atan, Delhi-a Central Laboratory-ah endiktir a ni tawh a. Tum hnih endiktirin result pawh an dawng tawh a, a quality a inthlauh em avangin a tum thum nan laboratory dangah endiktir leh a ni dawn tih a sawi.
“Tum hnih kan endiktir tawh a, a result a inang lo ve ve. Tum khatah a quality a chhe hle a, tum khat dangah a chhe lem lo thung. Chuvangin, chawhruala a result khaikhawm theih nan laboratory dangah endiktir leh a ni dawn a. Hemi hnuah chuan endik nawn leh ngai tawh lovin a dinhmun dik zawk a hriat theih tawh dawn a, mipui hriatah pawh a puanzar theih tawh ang,” a ti.
Lalnghinglova Hmar chuan March 10, 2025-a zu khapna dan siam thatna Assembly House-a pass tak, ‘The Mizoram Liqour (Prohibition) Amendment Bil, 2025’ hnuaiah grep mai bakah Mizoram thlai leh theirah thlanchhuahte hmangin local beer leh wine siam theih a ni dawn tih sawiin, “A siam chhuah leh zawrh chhuah dan pawh mumal leh tha zawka kalpui tum a ni,” a ti a. The Mizoram Liquor (Prohibition) Amendment Rules, 2025 chu October i 1, 2025 khan gazette-ah chhuah a ni tawh tih a sawi bawk.
Local beer leh wine siam chhuahte hi zalen taka a duh duhin lo siam ngawt theih a ni dawn lo tih sawiin selection committee din fel a nih tawh thu a sawi a. Permit dilna hawn a nih tawh thu leh dil an la awm rih loh thu an sawi.
Excise minister chuan miin an hmuh dan chu hre chiah lo mah se department hmasawn ber nia an inhriat thu sawiin lawmawm a tih thu a sawi a. Sorkar department ngaih pawimawh hlawh lutuk lo niin a tlabal hman hle a. Mawhphurhna a lak atangin thawktu mihring leh office neih zatte pawhin hma a sawn tih a sawi.
Minister sawi danin Excise & Narcotics department (END) ruihhlo man, court-in a chin fel tawhte chu hal ral thin a ni a. Tun sorkar chhungin tum thum hal ral tawh a ni a, heng ruihhlo hlutna (local market rate) chu Rs. vbc. 71.64 a tling a. Kumin 2025 chhunga ruihhlo vanga thite hi mipa 74 leh hmeichhia 14 an ni a. Kumin chhunga ruihhlo vanga thi tam ber thla, July-ah mi 16 an thi a, May-ah 15 thi an awm bawk.
Ruihhlo do kawngah tlawmngai pawl, home department-te nen pawh an thawhhona a tha a. Chutih laiin, ruihhlo hi a a la rem lo tih sawiin Lalnghinglova Hmar chuan, “Kan ram a dam lo va, tanrual a ngai a. Tun sorkarah ruihhlo man zat pung hi lawmawm lutuk ni lo mah se, thawktute inpekna leh thawhrimna avangin achievement a tlingin ka hria,” tiin, excise department chu ruihhlo do a, mantu ni chungin ruihhlo ngaite an do lo va, chhawmdawl nan theihtawp an chhuah tih a sawi.