- K. Hmingthankaia
Sawrkar tih ngam loh leh tih theih loh chu Central YMA-in a ti leh ta nge nge e’ tih ka ziahah khan, Aizawla addict ho hnawksak lutuk vawi tam ka lo ziah tawh chu Central YMA- in hma a rawn lak dawn thu an Presidentin a puan tak avanga ka lawm thu ka sawinaah khan, city bus-ho an stand-a an ding rei thin lutuk hi ka ngaihmawh thu vawi tam tak ka lo ziah tawh, mahse, sawt thei chuang si lo chu Central YMA-in hma la ve law law se tih lampang khan ka ziak kha a ni a.
Khata ka ziah dana ka tawngkam hman thenkhat avang khan ACBOA leh Driver & Conductor Welfare chu an lawm lo hle a lo a ni a.
Kei pawhin an lawm lohna chhan ka tawngkam hman tak hi chu a tirah pawh dik ka ti bik lova, ka ti zing mah mah tawh em a, tun tum chu an haw ve tawh mai thei a ni ti rilru chunga, ‘ Nikhat thil thua ban theih driver leh conductorten nikhat thil thua hlep ruk tur an duham vang mai mai a ni’ tih chu a inthamloh thlak mah mah a ni tih rilrua hre reng chung chuan ka’n hmang lui leh ta ngat kha a ni a. He tawngkam hi city bus chungchang ka ziah apiangin nikum lam tang tawh khan ka hmang tawh a ni.
A tir atanga ka hman tan nachhan tak hi chu heti lam hawi zawng deuha sawi theih tura anmahni chhung lam atanga thu ka dawn vang a ni a. Mahse, ka thu dawnna hian heti taka mi dang thin khei ngat tur zawnga ka ziah hi chu a ring kher lovanga, chutiang zawnga ka ziah pawh a ring kher hek lovang. Mahse, kei chuan ka chin dan thinin, mi thinlung deng na deuh salh tur leh thin khei deuh sak tur chuan ka lo ziak leh thin a ni. Chu chu ka chin dan a ni. Chuvangin, tuna an thin a khei leh an rilru a na pawh hi a awm ka ti a, kei pawh ka inthiam chuang lo.
Tin, sawi nawn ngai lovin conductor leh driver zawng zawngte hian an hlep ruk leh ruk loh chu kan hre thei vek lova, chutih kara hetia tawngkam na taka ka lo ti pawh hi hlep ru ve ngai lo, mi tha leh thahnemngai taka titu tan chuan a na ve dawn bawk a ni tih chu ka hriatthiampui hle bawk a ni.
Amaherawhchu, city bus-te an stand-a an din rei leh rei loh chu mipuiten kan hre chiang thung.
Tichuan Traffic SP room-a ka awm lai tak chuan ACBOA office a leng tur chuan phone-in min rawn sawm ta a. An rilru tur chu hresa reng chuan phur takin, ‘aw ka lo kal ang’ tiin ka chhang a ni.
Tichuan, an office-ah chuan hawihawm takin min lo dawngsawng a, keiin, ‘ Hnehsawh tak tak hian ka tihkhum zing tawh si che u a, min vaw hrep dawn em ni. In thinur har hi ka ti tawh zawk a nia’ tiin fiamthu ti takin bul ka tan a. Annin nui chungin, ” Tunlai boruak chungchang velah hian thil sawi ho ila, Pu Kaia pawh sawm ve ila kan ti a, hei i lo kal thei a a tihzia hle mai’ tih lamin bul an tan ve bawk a.
Tichuan, ram leh mipui tana theih tawpa rawng an bawl venate leh, englai pawha a tha zawnga tan an lak nasat reng thu leh, an naute pawh an zilha an fuih reng thute, hrem ngai pawh an hrem fo thute leh, a khat tawka camping lamahte Pathianthu nena an enkawl thin thute leh, kan khawpui leh mipui tana hil tha ber tur an ngaihruah ve reng thu bakah, an hma lakna eng eng emawte an sawi a.
Chubakah, dumdawng pawisa zawng ve tho an nih avangin, hlawk deuh tur stand thenkhat erawh chu rualkhai deuh zawka pawisa an hmuh tlan theih nan tia tlema ding khawmuang deuh tura ruahman an neih thu pawh tlang takin an sawi a ni.
Tin, Aizawl traffic jam an vei ve zia thu leh a ziawm theih dan tur an ngaihtuah ve reng kara city bus-te hi traffic ti jam- tu ber ang thawthanga an chhuah fo chu na an tih thu leh, city bus-te hi traffic ti jam-tu ber an nih bik loh thu leh, an ngaihthiam loh lek lek thute an sawi a. Tin, thu dang pawimawh tam tak pawh inpawh takin kan sawi tlang a ni.
Tin, kan ram tana thahnemngai taka thu hrang hrang ka lo ziak ve thin chu lawmawm an tih thute, Aizawl traffic jam ka vei thu leh, a ziaawm deuh theihna tur ka zawn nasat thin thute chu lawmawm an tih thute chu ka phu lohin min fak bawk a. Theihtawp chhuah zel tur pawhin min fuih bawk a ni.
Mahse, chutianga thahnem ka ngaih luatna lama ka tawngkam hman thin, ‘Driver leh Conductor nikhat thil thua ban theih reng ten nikhat thil thua hlep ruk tur an duham vang mai mai’ tih chu a zozai tawh lutuk a, na an tih ve tawh thu leh, an tawrh theih bik tawh lo thu chu an sawi ta a ni. Hemi ni, 16.12.2025 ni hian Driver & Conductor Welfare hotute pahnih an tel ve a ni.
Keiin, ‘ In thin a khei zak hi a dik a ni. In thin khei zak ngei tura ziak ka ni reng a ni. Chu chu thil dangah pawh ka thu ziah dan pawh a ni. In thinur har hi ka ti zawk tawh reng a ni. Mahse, tun tuma ka ziah leh dawn hi chuan, ka ti lutuk zing ta mah mah e, ka diriam zing mah mah tawh si a, tun tum chu an thinrim ve tawh ngei ang tiin, inthiam lo chunga ziak leh lui ngat ka nih vangin, in thinur ta pawh hi ka thiam che u a. Keima thiam loh a ni e, tiin tlang takin ka sawi a.
Tin, frank tak bawkin heti hian ka ti leh bawk a, ‘ Driver leh conductorte hi ka hnuaichhiahin ka hmusit thin lutuk che u a, min chhang ve duh lo tih vang hian ka diriam mah mah thin che u tih hi ka hre reng a, kei pawh inthiam lo deuh chunga tun tumah hi chuan ziak leh ngat ka nih avangin, in lungawi lohnaah hian ngaihdam dil che u ka hreh miah lo a nia tiin frank tak leh tlang takin ka ti ni.
Anni pawhin traffic jam chungchanga ka thahnemngaihna avanga ka tawngkam uchuak tak a ni tih chu min hriatthiampuiin, inpawh tak leh tlang takin thu kan sawi tlang a ni. Tin, thil dang an lungawi zan lohna leh an ngaimawh leh an hriatthiam chiah loh thil an rawn phawrhte pawh thil awmzia tha takin kan sawi tlang a ni. Heng bakah hian mipui tana hriat tur pawimawh tak tak thil dang eng eng emaw kan sawihote hi chu a tul dan azirin hun danga sawiah dah hrih ila.
Tichuan a tawi zawngin, keiin hre reng chungin mi lungawi lohna tur thu ka sawi lui miau a, an lungawi lo ta ngei a, kei lahin ka thiam loh a nih miau avangin lungawi lote lungawina tur chuan ngaihdam dil chu ka lo hreh der si lova. Mahse, Zoram pum hriat a lo nih ve si avang leh, a lungawi lote chu a hminga pawl ang an lo nih ve bawk si avang chuan, an member, ACBOA bakah, a bik takin conductor & driver dangte lungawi nan chuan a hminga inremna siam ve chu a ngai si a, a hnuai ami ang hian-
NGAIHDAM DILNA: Aizawl traffic jam tih ziawmna tura ka thu ziah ni 13.12.2025 a ZoZam chanchinbu tih chhuah chuan Aizawl City Bus Owner Association (ACBOA) leh Driver & Conductor Welfare (ACBD&CW) te rilru a tih nat avangin pawi ka ti a, an chungah ngaihdam ka dil e. tiin.
He thil leh he thuah hian mahni thiamthu leh tanhmun zawngin, a inep leh inchhal zawngin kal dawn ila chuan, a tu ve ve pawh thui tak kal thei kan ni.Anni an lungawi loh ang bawkin kei pawhin na takin ka ti let thei a ni. Mahse, keiin miin ka thusawi dana lungawi lohna an neih na na na chuan, an huat tur ngeia sawi lui ka lo ni bawk nen, ngaihdam dil chu ka lo hreh lo nasa bawk si a. Tichuan, huatna leh inhauhna leh thinurna tel hauh lovin, inpawh leh innel tak leh, tan hona tur thil tam tak sawi ho chung leh Zonun zemawi leh Kristian taka lungrual taka ti kan ni a.
Tin, ACBOA lam hian ram tana thahnemngai taka thu ziak zui zel turin duhsakna min hlan bawk a ni. Tin, ka thu ziah ve thinin awmzia leh nghawng a neih nghal thin thute, anmahni ngei pawh ka thu ziah avanga Sawrkar department lam nen meeting an neih nghal thute mi hrilh a ni.
Chuvangin, hemi nia kan inkawmna chungchang hi chu chanchinbua rawn ziah leh kher pawh hi tul ka ti lo a ni.
Mahse, ACBOA lam ni lo, tuten emaw he thu hi lo hre thawiin, a chin chhuaka hre si lovin a hluhlang zawng leh, kei min diriam zawnga sawi vung kualin, ‘ Tun atang chuan chanchinbuah pawh thu a ziak ngam tawh lovang’ tih lampang zawnga an lo taimak leh tak si avang hian tul vak loah loh theih lohin frank takin ka rawn ziak leh si a nih hi.