Tleirawl a nih laia a zai tan phat khan mite nuihsawh leh fiam hlawh tak a ni thin a, YouTube-a hla a cover hmasak ber chu a sikul kalna hmuna tizaktu leh nuih rawntu lek niin, Shawn Mandes chuan a sawi.
Rimawi khawvela pop star lar ni pha hian a hun kaltawh a thlir let a, awmze nei taka zai a tan chhoh khan mite hmuhsit leh endawng a tuar nasa hle.
“Pawl kua zirlai ang chiahin ka la inngai. 2014 khan ka video hmasa ber YouTube-ah ka dah a, a tuk maia sikul ka kal chu min hmutu apiangin min nuih hlawm a, hall ka pan lai phei chuan tlema upa deuhten min au nawmnah a, ‘Shawn, min zaisak rawh,’ tiin min ti-el nasa.
“Hlauhthawnna leh thla-barna nasa takin ka khat a, nuihzatbura min hmang kha a hrehawm a, mawl leh dik lo taka khawsa anga inngaihna ka nei hman hial,” tiin kum 27-na hmang mek chuan a sawi.
“Kawng lehlamah chuan ka vannei a, thian tha, nu leh pa duhawm tak ka nei a, min thlawp tlat a, ka tuinaah min pui a, min phurpui avangin mi tam takin mawlthlak taka an ngaih pawh phûr takin ka tih theih phah thin.
“Innuih zat chi-ah ka ngai lo va, mi tu emawin an tui zawng a tih laia rilru hrehawm taka lo siam hmanhmawh thin kha a tha ka ti lo. Mi tu pawh hian rilru fim leh thlamuang takin an tuizawng leh duhzawng an ti thei turah ka ngai,” a ti bawk.