Kumtluanin lirthei zuartute an hlawk a, an lirthei hralh theih loh lai an nei mang lo. Hei hian ngun taka chhut chuan traffic jam tam zawk hi chu min thlen tih a chiang reng.
Kan kawngpuite hi zauh ngaihna eih a awm tawh si lo a, lirthei a pung chho zel si nen, lirthei tlan theih loh khawpa jam kan nei chho ta zel mai hi a luhaithlak a, sorkar pawh hian a her rem dan mawlh an ngaihtuah an ngai tawh tak zet a ni.
Hunpui kan hmachhawn dawn a, kumtluana traffic lama harsatna kan tawhna thin khawpui chhungah lirthei zawng zawng an lo lutkhawm ta emaw tih tur khawpin lirthei a tam lehzual a, chhun zan zawmin traffic jam a awm ta mai. A beidawnthlak lek lek thin chu a ni.
Traffic police te an hah em em reng a, hun awl nei mang lo khawpin an awm phah a, a chhawrtu sorkar lam lah hian hlawh han pek belh eih an nei awm der bawk si lo. Lirthei tlan dan tam zawk hi anmahni avanga felfai thei a ni zawk tihte hi kan hriatsak pawh a tul hle.
Lirthei zuartute lam hralh chhuah hi a tam telh telh a, kawngpui ngai rengah kan la tlan zel dawn bawk si. Sorkar hian traffic jam sutkian dan tur hi zawng thuai thuai se la, lirthei document felfaite chauh an tlan theihna turin kumtir atangin checking te pawh hi nei mawlh teh se.