Viksit Bharqat Guarantee for Rozgar & Ajcevika Mission (Gramin) – VB G RAM G Bill chu Thawhlehni khan Lok Sabha-ah pharh a ni, hei hi MGNREGA thlakna tura duan a ni a, eptu party-te chuan hei hi an duh lo hle niin MPCC chuan Nilainia thuthar thehdarhtute an kawmnaah an sawi.
Congress Legal Cell Chairman T.T. Zothansanga, Ex MLA chuan, “Kum 2005 a Man Mohan Singh-a hova ni 100 inhlawhna dan siam, tun thlenga India ram puma hman hi thiah a, thlak tum a ni. Nimina (Thawhlehni) Parliament-a bill pharh a nih hian Opposition lam atangin sawiselna nasa tak a awm a, 2005-a MGNREGA (Ni 100 inhlawhna) pass a nih laia party zawng zawngin lungrual taka an thlawp hi a la tha tawkah an ngai a, fing tak leh thiam taka duan, BJP ten a aia dan thalo leh mipui nekcheptu tur hi tha lo an ti a ni,” a ti.
Bill tharah hian hnathawh hun hi Ni 100 atanga 125-ah a tisang a, mahse, an thawh kim loh pawhin rights anga claim theih a ni tawh dawn lo a ni. State liante chuan 40% an tum theih loh tur thu an MP-te kaltlangin an sawi nghal a ni, a ti bawk.
T.T. Zothansanga chuan BJP sorkar hian India rama thil tha tak tak lo ti tawhtu leh inpumkhatna lo thlen tawhtute hmalakna hi zawi zawia nuai reh a, anmahni hmalakna anga kaltir zel hi an tum a, tuna ni 100 inhlawhna pawh hi kum 2005-a Congress sorkarin a ruahman, kum 20 zet hlawhtling taka lo kalpui tawh a ni a, kum 15 chhunga lo hlawkpui tawh pawh kha mihring billion 31 zet niin, Rs. vbc 6400 zet lo sen tawhna a ni. Congress bul lo tan tawh a nihna hi tireh turin a hming hi thlak danglam a, nakkin hnua an tih ang taka lantir an tum tih a sawi.
MLA hlui hian, “Mahatma Gandhi hi India hnampa a ni a, Direct takin an sawisel ngam lo. Mahse, zawi zawia a hming tihreh hi an tum em em a ni. Mahatma Gandhi hi kum 1924 khan Congress President lo ni tawh a ni a, a ho hian India zalenna kan hmu a, heti chung hian BJP-te hian a Congress nihna lai kha hmu lianin, thiam takin a hming daihna tur hian hma an la chho zel tih hi a chiang em em a ni. MG tih lar aiin Rama tih lar hi an duh a, MGNREGA tih pawh VB G RAM G-in an thlak dawn a ni,” a ti bawk.