Aizawl: Study Team-in sorkar leiba a tahtawl-a rulh an rawtna chu pawm a ni.
Ningani khan CM Conference Hall-ah Mizoram sorkarin sorkar leiba, Detail Project Reports fel fai zawk, GST lakkhawm dan chak zawk leh a kaihhnawihte zirchiang tura a din, Study Team on Estimation of DPR, GST Collection, Contractor Profit Deduction & Committed Liability chuan an zirchianna atanga an thil hmuh hrang hrang Chief Minister Lalduhoma an hrilhfiah a. Study Team Chairman TBC Lalvenchhunga’n an rawtna hrang hrang a sawifiah.
Thutkhawma Study Team-in sorkar leiba rulh ngaite chu a tahtawla rulh te, tuna PWD in leiba Rs vbh. 5.83 an nei chu sorkar kum kal meka tihfel te, P&E department-in leiba Rs vbc. 12.62 an neih chu sorkar kum hnih chhunga rulh te, PHE department-in leiba Rs vbc 58.07 an neih chu sorkar kum thum chhunga rulh an rawt a, pawm a ni.
Heng hna thawktute hian GST an tifel ngei ngei tura tih niin, Works Department pathumin leiba an neihte hi GST hman hnua mi vek a ni.
Study Team chuan, heng leiba hrang hrang hi a awm zui tawh loh nan hmalak dan tur an duang nghal a. Hmanhmawh thila hnathawh a tul anih pawhin phalna lak zel tawh tur a ni a. Hmasawnna hnathawhna leh GST lakkhawmna kawnga rawtna te, Detail Project Report siam dan inang tlang neih dan turte, PWD SOR ennawn leh rawtna dang eng emaw zat an siam a, hengte hi a taka hman theiha peih thuai tur a ni.
Chief Minister Lalduhoma chuan sorkar leiba chu khuarei thil an lo ni tawh thin a, tuna a awm tawhsa chu study team rawtna angin an kalpui ang a. Ba awm leh zel tur erawh an veng tur a ni, a ti.