Barcelona President Joan Laporta chuan an khelmual Camp Nou-ah an player ropui, Lionel Messi lim din a tum thu a sawi.
Laporta chuan, “Lionel Messi tan Barcelona hian hriat rengna buatsaih a phu em em a, khawvela ropui ber buatsaihsak hi kan tih awm tak a ni a. Board of director mai bakah a teammate-te nen pawh kan sawi thin a, Messi tan hian thil ropui deuh, eng emaw tak hi chu tih ngei kan duh hlawm,” a ti.
Barcelona youth academy La Masia chungchang ziahna lehkhabu tlangzarhnaah Laporta chuan, “Camp Nou-ah hian Messi lim hi din ngei tulin ka hria a. Ladislao Kubala leh Johan Cruyff te pawhin Camp Nou pawna lim an neih chuan Leo pawh hian a neih ve ngei hi a tul tlat. He club hming tilartu player ropui a ni chiang em mai a, kan chawimawi let hi a tul,” a ti bawk.
Vawi riat Ballon d’Or dawng thei, Messi chuan August, 2021 khan suma an tlak chhiat avangin Barcelona a chhuahsan a. Argentina captain hi Barcelona-ah kum 21 chhung a awm a, he mi chhung hian nomawi 34 a la hman a ni.
Covid-19 len lai a nih avang khan Barcelona tana khel khel hnem ber leh goal thun hnem ber, Messi-a hian mumal takin inthlahna thu a sawi thei ta lo va. Tun hnuah a lo suangtuah anga Barcelona a chhuahsan tak loh thu hi sawi chhuakin, hmanniah khan inmangthana hun chu hman a tum thu a sawi chhuak ta a in.
Messi lim din chungchangah Laporta chuan, “Tunah hian Messi lim din chungchangah hma kan la chho dawn a, an chhungkaw remtihna lak hmasak a ngai dawn a. Hun tha kan neih a, design kan nei a nih chuan hma kan la zui vat ang a. Club thuneitute chu kan lawm viau dawn a, Barcelona player ropuite lim awmna hmuna Leo Messi lim a awm ve chuan kan club tantute pawh an lawm hle ang,” a ti.
Messi chuan Paris Saint-Germain chhuahsanin kum 2023 khan Major League Soccer club Inter Miami a zawm a. Tun hnaiah khan contract a ziah belh a, 2028 MLS Season tawp thleng a la awm zui dawn a, chutih hunah chuan kum 41 a ni ve tawh dawn a ni.