Krismas leh Kum thar hunpui lo thleng turah mipuiin ralmuang taka hun an hman theih nan Aizawl district chhungah dan leh thupek kengkawhin nasa taka hmalak a nih thu a sawi a; dan bawhchhia an mante chu na takin an chungah action an la dawn tih Aizawl SP Zosangliana’n a sawi.
Ningania a pisa-ah thu thar thehdarh tute kawmin Aizawl SP Zosangliana chuan, hunpui vuakvetah venhimna khauh taka kalpui a ni dawn tih sawiin, Aizawl khawpui chhungah kum hmasa lama Zone 3 an siam thin chu tihbelhin Zone 4-ah thenin, Zone tinah DSP chin Zonal officer dah an ni dawn a, zan lamah ngawrh lehzuala police patrolling an neih thin bakah chhun lamah pawh patrolling neih thin a ni dawn a, hmun pawimawh zualah duty dah reng a ni dawn a, ni tin darkar 24 chhung mipuiin an mamawh huna an koh theih turin an awm dawn tih sawiin, “Mi dangte hlimna leh zalen taka hun an hman theihna kawnga harsatna siam an awm chuan dan angin hma kan la dawn,” a ti.
Aizawl SP chuan, “Hunpui laiin kan chhuak tam a. Hengah hian police-te pawhin rui chunga lirthei khalh te, lirthei khalh chak lutuk te, license nei lova lirthei khalhte pawh kan endik thin dawn a ni,” a ti a, dan leh thupek kengkawh turin theihtawp an chhuah dawn tih a sawi.
Boruak thianghlim hnuaia mipuiin hunpui an hman theih nan, halpuah leh halmawi zawrh leh hal khapna thupek kenkawh kawngah pawh nasa lehzuala hma an lak mek thu sawiin Aizawl SP chuan, Central YMA te nen halpuah leh halmawi zuar an awm em tih ngawrh takin an check chho mek zel tih a sawi a. November thla tawp lam khan mi pakhat kut atangin Rs 40,000 man vel an man tih loh chu man an la neih loh thu a sawi.
Aizawl SP sawi danin, kumin December 17 thleng khan Aizawl DEF hnuaia Police Station hrang hrangah thubuai 1,764 ziahluh niin, heng zinga thubuai 1,150 chu chhuichhuah tawh a a ni a, thubuai 1,009 te chu investigation process zo felin Final Report (Chargesheet) thehluh a ni tawh a ni. Thubuai 421-ah hnuchhui hna la kalpui mek niin, chhuichhuah loh thubuai 333 a awm bawk.
Heng thubuai vanga pawikhawihtu an man tawh zawng zawng zat chu 2,000 an ni a. Thubuai ziahluh atanga za zel 66 (1,176 cases) hi rukruk leh inrawk thubuai an ni a. Kumina thubuai ziah luh court-in a chin fel tawh atanga za zela 91.7-ah dan bawhchhetute thiam loh chantir an ni bawk.
Aizawl district hnuaiah Bawngkawn Police Station hian thubuai ziah luh an nei tam ber a, 636 ziah luh a ni tawh a ni.
Kum kal mekah Aizawl district chhunga thubuai liantham zingah tualthah thubuai 11 ziah luh a ni a, heng zinga thubuai 10 hi chhuichhuah tawh niin thubuai pakhat chhui mek a la ni a. ND&PS Act hnuaiah thubuai 32 awm tawhin, dan bawhchhia mi 36 man an ni tawh a. Ruihhlo chi hrang hrang – Heroin, Crystal Meth leh Ganja an mante chu Rs. vbc 43.296 man hu a ni.
Kumin chhungin Aizawl khawpuí chhung hmun hrang hrang bakah, Sairang rel chawlhhmun leh a chhehvelah te ILP endik vawi 160 an nei tawh a, ILP nei lo emaw ILP dik lo taka hmang mi 932 man an ni tawh a, thubuai 77 ziah luh a ni tawh a. Sairang rel chawlhhmun atangin ILP 18,193 pe chhuak tawhin; ILP nei lo, kutdawh leh zu rui mi 36 thawn haw a ni tawh bawk.
Kumin chhung hian sar thi kan tih mai, Unnatural Death (UD) case 158 an nei tawh a, chung zinga thih chhan langsar deuhte chu mahni inthat (suicide) 30, tui tla 12 leh damdawi overdose 36 te an ni a, heng bakah hian mi 78 te chu accident hrang hrang leh thih chhan hriat chian loh te an ni.