Aizawl: Sports Minister Lalnghinglova Hmar-in Cricket Association of Mizoram (CAM)-in Mizoram Cricket Team-te Syed Mushtaq Ali Trophy Plate 2025 champion lawmna an buatsaih a hmanpui.
Ningania Hotel Floria Rooftop-ah Mizoram Cricket Team champion lawmna hmanpuitu, sports minister chuan cricket team hlawhtlinna chu lawmawm a tih thu a sawi a. Player-te chu an thlen china duhtawk mai lovin, sang tak thlen tum turin leh tih tak takna nena khel tura a fuih.
Cricket-ah eizawnna tlak a awm thu sawiin, inkhel mite chu an chhungkua, khawtlang leh kohhran leh Mizoram theihnghilh mai lova malsawmna pe lettu ni fo turin a chah bawk.
Syed Mushtaq Ali Trophy hi India ram T20 cricket competition, Board of Control for Cricket in India (BCCI) buatsaih a ni a, 2025-26 inelnaah hian team 38 telin Elite Group (32 teams) leh Plate Groups (6 teams)-ah te then an ni. Plate Group bikah hian cricket-a region hnufual deuha mi team paruk an tel a, vawi khat theuh intum kualin a sang ber pahnih, Sikkim leh Mizoram ten final an lut a. Pune-a final an khelhah Mizoramin Sikkim chu run 10-a hnehin an champion ta a ni.
Plate champion e hian season lehah Elite section an khel thei dawn a, Elite Group-a rank hniam ber aiin an khel dawn a ni.
He hunah hian Mizoram Men’s Under-23 te lawmpuina hun hman a ni bawk a. Mizoram Men’s Under-23 Cricket Team pawh hi Under-23 Category ah runner-up an ni.