Aizawl: MZP President Dr C. Lalremruata chuan zirlai hnufual zawkte an sikul hming ngeia board exam an hmachhawn theih nan hma an la zawk dawn tih a sawi.
Kumin atana MZP Pisapui kharna hun leh Advance Christmas nimina MZP-in an hmanah thu sawiin MZP President chuan, sorkar thuneitute’n board exam-ah selection neih an rem tih tawh loh laia, sikul thenkhatin board exam result tha duh avanga zirna kawnga hnufual zawkte an sikul hminga exam tir an phal lo thin chu hriatthiam har an tih thu a sawi.
Hemi chungchangah hian School Education Director hnenah hma la turin ziaka thlen a ni tawh tih sawiin Dr C Lalremruata chuan, zirlai hnufual zawkte pawh zirtirtu qualify ngeiin a kum khat chhung an zirtir chung a, zirlaite an la fail thin chu mak a ti thu a sawi a. “Anmahni sikul hming ngeia an exam theih nan MZP chuan hma a la zel dawn a ni,” a ti.
MZP president chuan, kumina Students’ Aid Fund (SAF) an tlangzarh thei chu a lawmawm a tih thu a sawi a. Mizo zirlaite tan Students’ Aid Fund(SAF) chu kumthar atangin, management committee hnuaiah mumal takin zirlai an zirna kawnga chhawmdawl ngaite tan a sem chhuak tan dawn tih a sawi bawk.
MZP Pisapui hi January 12, 2026 (Thawhtanni)-ah an hawng leh dawn a ni.