Australian Open final-a phu taka a chak rualin Carlos Alcaraz-a chu Grand Slam puitlin thei naupang ber a ni nghal a. Novak Djokovic-a’n major title 25 lak a tumna a dang bawk.
Kum 22 hi Pathianni khan Melbourne khawpuia 2-6 6-2 6-3 7-5-a hnehna a chan rualin lawm avangin chhuatah a tlu a. Chak lo zawk mah ni se Djokovic-a chuan net zuan kân a lawmpuizia a lantir nghal bawk.
Serb hi tennis player ropui ber ni mek a ni a; mahse, a hneh loh tak lakah hian he nihna hi rei tak a hum thei dawn em tih chu zawhna lian tak a ni nghal.
Inkhelh zawhah vawi 10 champion tawh hian Melbourne khelmualah hian a ding nawn leh thei ang em tih pawh chiang lo takin thu a sawi a. “Grand Slam ceremony-ah hian ka ding leh dawn tih pawh ka hre thiam lo,” tgiin kum 38 chuan a sawi.
“Tuin nge naktuk emaw, thla ruk emaw, thla 12 lo awm leh tura thil lo thleng tur tuin nge hria? Mahse, kalkawng ropui tak chu a ni hrim hrim mai,” a ti.
Spanish World No. 1 Alcaraz hian bul a tan tha tawk lo va, Djokovic-a’n awlsam takin a la.
A hnu lamah erawh Alcaraz insiam thain a hnung lam atangin 4th seed Djokovic a chhaih buai zui viau a, a Grand Slam nomawi pasarihna a la.
Alcaraz-a hi Grand Slam tournament pali – Australian Open, French Open, Wimbledon leh US Open la kim vek thei pakuana a ni a, kum 2016-a Djokovic-a’n a lak hnua la kim leh thei hmasa ber a ni.