Aizawl : Mizoram State University Amendment Bill 2026 pass anih avangin Chhimbial Chhantu-in lawmthu sawi.
Chhimbial Chhantu chuan, Mizoram Legislative Assembly pakuana thutkhawm neih mekah, ‘The Mizoram State University Amendment Bill 2026’ pass a ni ta chu lawmawm an ti a, he bill pass a nih theihnana chak taka hma la tu – Mizoram State University Demand Committee Lunglei leh Lunglei MLA palite bakah Chief Minister leh Higher & Technical Education Minister, Dr Vanlalthlana te chungah lawmthu an sawi.
Chhimbial Chhantu chuan he bill pu lut tu, Dr. Vanlalthlana’n State University in a huam tel tur (Cluster of Colleges) zingah Mizoram Engineering College leh Lunglei Government College te an tel dawn thu a sawi chu lawmawm a tih rualin, zirna in dang – Govt’ J. Buana College leh DIET Lunglei te an la tel ve loh avangin, a rang thei ang bera cluster of colleges zinga telh an nih theih nan Mizoram sorkar a ngen bawk.
‘Mizoram State University Headquarters Aizawla awm tur a Mizoram Assembly-in a pass tawh hi kaltlangpui nise, hemi rual hian Chhim bial mipuite duhdan leh beisei ang ngeiin State University dang, Lungleia Headquarters awm tur din ni bawk rawh se’ tih MNF MLA ten Private Member Resolution an thehlut vek mai chu mak an tiin, pawi an tih thu an sawi a. State University pahnih din chu State pachhia, Mizoram tan thil theih a ni lo tih, tute pawhin an hriat chian em em laia MNF MLA ten State University pahnih din an rawt chu Chhimbial mipuite an duhsak loh zia lan chianna leh Lungleia State University din tur sawi hnawmnaah an ngaih thu an sawi.
Chhimbial Chhantu chuan, “Lungleia State University din tur chu Lunglei leh Chhim lam mipuite ta bik chauh ni lo vin, Mizoram pumpui ta tur a ni Zzoram mipuiten hrethiam se a duh a, Mizoram zimteah hmasawnna rualkhai awm se, hmasawnna ruhrel leh thil dangte pawh, hmun khata dahkhawm zel lo in semzai ni thin se tih chu kan duhdan a ni,” an ti.