Aizawl : UDPA department hotute chuan an director Jacob Lalawmpuia hoin Inrinni khan khawpui himna leh mawina atana ‘Storm Drain Projects’ tih hmingpua tui luankawr siam mekte an enfiah.
UDPA department hotute hi contractor leh hna vil tura ruatte’n an lo dawngsawng a, an hnathawh chin leh hmachhawpte an lo hrilh. UDPA Director chuan contractor-te chu tha tak hnathawk turin a chah.
Jacob Lalawmpuia chuan hnathawhte chu hlawm lian tam tak takte a nih hlawm avangin tun thal chhung chuan an zawh hman loh tur thu sawiin, “Thal chhungin an theih chin chin an thawk a, thal thlen leh hunah an chhunzawm ang,” a ti.
Storm Drain Projects hnuaiah hian SASCI sum Rs vbc 104.28 sengin district khawpui hrang hrangah tui luankawr siam a ni dawn. Hei hi ruahtui leh kan tui hman tui luankawr ni loa luang tam lutukin leimin a thlen venna atana tih a ni.
Tui luankawr siam hna hi district khawpui tinah tih tur niin, Aizawl bikah chuan cheng vbc 61.76 sengin, hmun 26 ah km 8.136 siam a ni dawn.