- Dr. C. Lalrampana
Mizoram Pradesh Congress Committee [MPCC]-n :Sairang rel station a Bazar Nî siam tum hi tih loh ni rawh se.” tia March 2, 2026-a an thuchhuah kha uluk takin ka lo chhiar a. Heitia an tih chhan hi Ni 23 Febuary 2026 thawhtannia Chief Minister -in Assembly House session-ah ‘Sairang rel station ah bazar ni siam tum a ni’ tih a sawi vang kha a ni. congress party chuan he thil hi “kan duh lo” an ti tawl ringawt a. An sawi zel danin -”Bazar ni siam a nih chuan ‘vai sumdawnna nî’ kan siam dawn tihna a ni a. Mizoram pawisa luanralna nî a ni bawk ang. Mizo chawhmeh lei turin vai an lokal khawm dawn lo va, chawhmeh leh bungrua, thawmhnaw zawrh tur an rawn keng lut teuh dawn a. Sumdawnna min chimralna tur kawng pakhat a ni thei bawk.” an ti a ni. A tlang kawmnaah “Sorkar hian ngaihtuah nawn se, Sairang Rel station-a bazar nî siam hi ti lul suh se.” an tihzui bakah an President Lal Thanzara meuhvin hming a ziak bawk.
Kan rama eptu Party-te hian hian thil rêng rêng hi uluk taka ngaihtuah chiang hmasa lo hian PR, PHO, circular, pamphlet etc hi an chhuahleh chiam zel thin niin a lang. Eng party pawh sawrkar se, ram mipuite tan tha tura hmalakna tawh phawt chu lawm taka pawmpui a, nawr chak sauh zawk awm tak, thil hote tê hi an buaipui chiam thin niin a lang. An thil chin tha lo tak hi sim vat hlawm se kan ram a changkang zawt zawt mai ang. Relkawng ngat phei hi chu Congress sawrkar laia Ex-CM Pu Hawla policy ni khan a lang a, a hma lakna avangin tunah, tlaikhawhnuah ZPM Ministry-ah a hlawhtling thei hram a, mipui kan lawm tlan tehlul nen. Rel station-a Bazar ni siam lo duh lohleh tlat mai hi chu ‘khuang lova chai ang’ chauh a ni dawn a, chuvangin, inlakbingna thlarau sual [the devil of communalism] hi eptu party-te hian paih bo vat se a tha ngawt ang. Khawvel hmun hrang hranga rel chawlhnaah bazar ni bik emaw, englaipawha bazar theihin an inhawng zawk a ni ngai a, helai mihring nuai 13 pawh la tling mang lova Rel station kan neih ve chhuna bazar ni siam lo dodal tlat hi zawng a changkang lo takzet niin a lang.
Sawrkar hian Sairang rel stationah hian Bazar ni hi a rang thei ang berin felfai tak leh mumal takin siam ngei se, mahni tualchhung chawhmeh thlai leh thei ilo to uchuak lutuk, kristian nundan tur ni awm lo khawpa mirethei min rawk mekna hi a ziaawm ang a; Phai lam thawmhnaw, dawr bungrua to uchuak lutuka MRP thai chhiaa huaisen tak taka an zawrh mekte luahlan thak thak khawp turin bungrua chawlut tam bawk ila, mirethei tan a hlu lehzual ngei ang. Kan PM Modi-a sawkarna hnuaia Delhi atanga development fund tangka kumtin kan dawn thin hi vai pawisa vek a ni a, Mizoram pawisa a awm hran chuang lova, vai pawisa kan dawn hi a then vaiho bawkin an dawng letleh dawn tihna a ni mai a, bazar ni siam loh phah nana chhuanlam atan chuan a nep lutuk mah mah a ni law’m nit Hnamdang engemaw zah rawn phurluttu rel ber kan nei tawh a, a behbawm lo hlauhleh lawi hi chu a finthlak teh chiam loh hmel hle.
Sumdawnna hi chimralnaa kan ngai fo dawn a nih chuan tumah sumdawng tawh lo mai ila, chaw nghei bak enge hmabak kan neih ang let Chimral kan kan hlau takzet a nih chun inthlah pung chak turin a takin tan la ngam ila, family planning bansan duh chuang lova, chimral hlauh leh lawi si hian awmzia a nei lo. India hi khawvela mihring tamna ber kan ni mek a, USA mi pakhat zel khu India mi 4 zelin kan man bet tawk chiah a ni. Ralthuam zawng ni lovin, kuttumin inbei dawn ta ila chuan kan sawp hrep thei tihna a nih chu! Chuvangin, India hian US-ho chimral kan hlau rêng rêng lo, kan rethei zawk tih mai loh chu! Mizote pawh tamin kan ram zimte hi tawt khawpin luah khat thei ila chimral hlau reng renga thawk dêp dêp kan chin thin hi a bo vek mai dawn a ni.
Kan fate theuh hi ruihhlo leh sualna lakah veng uluk ila, kumtin ruihhlo chihrang hrang avanga fam dairial chang zawih zawih thinte hi pumpelh turin tan la tlang ila, rel station-a hlawk taka bazar nia sum tuak chhuak turte nei teuh ila, vaiho nen kan thil neih inang lo tak tak, tha tak takte hi inthleng tawn zut zut thin ila eizawnna tha zawk kan insiamsak zawk dawn a ni.
Inchimral a thuin kan hlau hlura a takah kan hlau tak tak lo. Rinawmna hi inchimrallohna hmanraw tha ber a ni zawk. Mizo hmunga hnamdang sumdawnna kalpuitir hreh lo deuh vek hian rinawmna nei tak tak se, dawr kaite check kual sek a ngai lovang. Chuvangin, rinawm ila, inthlahpung ngam bawk ila, fa 10 zel nei theuh ngam ila Mizo hlirin sumdawnna kalpui ila kan ram, kan hnam kan humhim mai dawn a ni.