Aizawl: College of Veterinary Science & Animal Husbandary (CVSc & AH), Central Agricultural University, Selesih-in College Week khatna inkhawm Thawhlehni khan neiin, NIT Mizoram Director Prof. S. Sundar chuan khuallian niin a hmanpui.
CVSc & AH hian February 26 atanga March 3, 2026 chhung khan College Week vawi 24-na an hmang a. Hemi chhung hian intihsiakna hrang hrang neiin undergraduate class hrang hrang (1st yr BVSc&AH atanga 5th yr BVSc&AH) leh Post-graduate zirlai (MVSc leh PhD) te an tel.
College week hawnna hi February 26, 2026 khan CVSc&AH ground, Selesih-ah neih a ni a, ni nga chhunga intihsiakna neih anih hnuah College Week kharna hi March 3 chawhnu khan College Auditorium-ah neih a ni.
Week kharna hun hi Prof. S. Sundar, Director, NIT Mizoram chuan khuallian niin a hmanpui a. Intihsiakna hrang hranga tithate hnenah lawmmman semin zirlaite fuihna thu a sawi bawk.
CVSc&AH, Selesih hian an campus chhungah infiamna hmunhma hrang hrang an nei a, hmun danga kal chhuah ngai lovin college week hi an campus chhungah vek an hmang thei a ni.