India leh khawvel hmun hrang hrangah mi maktaduai tam takin rawng kût, Holi chu Nilaini khan an lawm.
Thal kût, thil thain sual a hnehna lawmna hun hi thlasik a liam ta tihna lantirna a ni bawk.
Mite chuan tawngtaina an hlan a, chhungte leh thiante chungah rawng êng tak tak an hnawih a, lawmna atan hnam chaw leh thlumte an ei bawk a. Kawngpuiah pawh an inkhawm a, rawng an intat hlawm.
Holi hi Hindu thawnthua ramhuai hmeichhia, Holika-i’n a unau fa, Prahlad-a’n Hindu pathian, Vishnu a biak avanga thah a tumna atanga intan a ni a; mahse, Prahlad chu meiin Holika-i a kan ral lai pawhin mak takin meipui atangin a dam chhuak a ni.
Mite chuan Holi hma tlai lamah meipui an hal a, hei hian thil tha lo chu tichhe vek dawn tih ringin thil thain hnehna a chang thei dawn niin an ngai.
A hmangtu tam tak chuan he kût hian Hindu pathian, Radha leh Krishna te pathian hmangaihna chawimawi niin an ngai bawk a. India hmar lam khawpui, Mathura leh Vrindavan-ah chuan Krishna pian leh naupan lai nena inzawm, lawmna chi hrang hrang mawi tak tak an hmang thin.
Mite chuan Holi lawmna atana hnam leh film hla hmanga rawng an thlak laiin rimawiin hmun pawimawh tak a chang bawk.
Naupangte chuan silai lem leh thil dang hmangin an thiante chu tui rawng hrang hrangin an kap a, an theh bawk.
Hemi ni hian thandai an tih, bawnghnute atanga siam in tur, thei hring nena thlum chu an in thin.
Hindu mipui tamna, Nepal-ah pawh Holi hi thahnemngai takin an hmang bawk.
Holi lawm hian mite chu khawlai leh kawtthlerah chhuakin an thiante leh an chhungte chu rawng êng lam chi hrang hrang – a sen, a senno, a eng leh a hring te chu an intheh nasa hle.
Holi hi Hindu kût ni mah se sakhaw zuitu hrang hrangte pawhin a lawmnaah hian an telpui thin a. India hmar lam, Hindu belt tia an sawi mai, Hindu tam zualna hmunah phei chuan an an lawm nasa hle.
Indian-te hian ram chhung bakah ram pawna awm Indian tam tak chuan an awmna hmunah an sakhaw hunpui lian ber pakhat hi an lawm hlawm.