Spanish La Liga President Javier Tebas-a chuan Manchester City thubuai chin fel loha awm reng chuan Premier League a tichhia niin a sawi.
English club lian, Manchester City hi February, 2023 khan league sum leh pai hman dan tum 100 chuang bawhchhia anga puh an ni a, he club hian heng puhna zawng zawngte hi nasa takin an pha thung.
Kum thum chuang a liam hnuah he puhnaah hian thuneituten eng thutlukna mah puan an la nei lo va, September, 2024 leh December, 2024 inkar khan a hranpaa chhuitu, commission-in thubuai hi ngaihtuah tawh mah se thutlukna erawh tih chhuah a la ni lo.
Tebas-a chuan a buaina ber chu thutlukna siam nana hun an hmang rei lutuk hi a ni lo a, hemi hun chhung vek hian club dangte chu dan an bawhchhiat nia puhna avangin thubuai siamsak leh hrem an ni tho si a, hetianga thubuai an pawt fan reng hian dan hman chungchangah rinhlelhna a siam zawk niin a sawi a ni.
“Hei hi rorelna lama hlawhchhamna a ni tih ka hria a. Manchester City chungah hetiang hi a thleng a, club dangte chuan an thlirin an ngaithla reng a ni,” tiin London khawpuia Financial Times Business of Football Summit neihnaa chanchinbu mite a kawmnaah Tebas-a hian a sawi.
“Club dangte chu pawisa chawitir an ni a, an point paihsak an ni bawk a. Dan zawm loh chuan hremna an tuar a, Manchester City erawh hrem lohin an awm reng si a. Premier League club tam tak ka be thin a, a tam zawk chuan hei hi an hrethiam bik lo,” a ti.
A sawi zelnaah, “Premier League anga league lianin sum hman dan dik chungchanga dan a neih chuan inelnaah leh club-te inkarah dan lamah tih dan chiang tak a awm a ngai a ni,” a ti bawk.
Manchester City hian thil sual engmah an ti lo tih finfiah nan hnial rual loh finfiahna kimchang tak an neih thu an lo sawi tawh a ni.