Provisional Adhoc School Union, Mizoram chuan an harsatnate hriatsaka an chanvo provision adhoc-a dah turin sorkar an phut.
Nilainia an thuchhuahah Mizoram sorkarin hun rei tak ata khawtlangin a enkawl school-te provisional adhoc-ah hlangkai mai tura ruahmanna nei siin, Provisional Adhoc Rules pawh peih fel vek tawh niin Gazette vek tawh a ni a, tun hnaiah lump-sum rules hmanga kaihhruai tumna a nei mai chu khawtlang leh zirtirtute chuan hriatthiam har an tih thu an tar lang.
Provisional Adhoc status beiseiin kum thum dawn hun an hmang ta tih sawiin an member zingah pawh anxiety hial neite an awm bakah thenkhat phei chu service kum nga chauh nei tawhte an awm a. Khawtlang tana zirna lo buatsaiha an hun tam tak zirna a lo hlan tawhte an ni a, an beisei loh lama kuai her an ni ta mai chu pawi an tih thu an sawi.
Upgradation hi dan kalh a nih thu sawi chung si a an ruala upgradation kalpui Adhoc school-te Provincialised an tum leh si hi mak an tih thu an sawi a, chutiang anih tak avangin an dinhmun tur diktak Provisional Adhoc-ah dah ngei turin sorkar an phut tih sawiin, “Kan dinhmun tur a chian hma chuan Assembly Resolution in a pass angin Promotion Result pawh tiam chin awm lova hren mek a ni a, kan sorkar hian kan harsatna min hriat saka kan chanvo Provisional Adhoc-ah min dah turin kan phut tlat a ni,” an ti.