Aizawl: Parents Society for Special Children of Mizoram (PASCOM) buatsaihin nimin khan ‘Rualbanlo Intawhkhawm vawi khatna’ hman a ni a, Persons with Disabilities (PwD) Commissioner Vanlaldiki khuallian niin a hmanpui.
Aizawl Chite Payground-a hun hmanah Vanlaldiki chuan rualbanlo tih chu mi tin ta a ni vek tih a sawi a, tute chungah pawh rualbanlohna chu eng hunah pawh thleng thei a ni tih sawiin, tun hma aiin rualbanlote chuan hma an sawn tawh tih a sawi a, hetihrual hian hmasawnna tur tam tak an la nei tih a sawi.
Vanlaldiki chuan rualbanlote mamawh ber chu anmahni kea an din theihna tura an phak tawk tura buatsaihtu leh an dinhmun hrethiamtu tih a sawi a. Rualbanlote chuan ngaihsak leh duhsak tak takna an la dawng tam tawk lo tih sawiin, tunah hian Mizorama district thenkhat disabled school la awm lohna awm a, an hmakhua ngaihsaktu an mamawh tih a sawi bawk.
PASCOM hi kum 2010 a din niin, tunah hian member 269 an awm mek a ni.