Mi tam takin nunna an chân a, tam takin an in leh lo an chân bawk. Thenkhat chuan an chhungte chin an hre lova, tun thlenga la inhmu ta miah lo te pawh an awm hial awm asin!
Kan Zoram zimte chu nasa taka nghaisak a ni a, hmun thenkhatah chuan a aia rapthlak awm leh chuang tawh lo hial turin bomb hmanga beih a ni bawk. A tuar nasa ber kan ram khawpui Aizawl chu meivapah a chang titih a, chung hunlaia an tawrhna zawng zawng chu tunlai thangtharte chuan an awih tawh lo hial zawk ang.
Chu min bomb atang chuan kum 60 hmel a lo hmu ve dawn ta reng mai. Khami hun hre pha tam tak chu an rilru a la dam thei lova, an hachang an la thial bap bap asin. Sorkar lehkha pawimawh tam tak a kangral a, mimal rohlu leh pawl hrang hrang bungraw neih tha tha a kangral vek bawk. Kan tawrhna kha a na tak zet a ni.
India sorkar chuan a ram mipuite ngei tia a sawi chungah a ralthuam neih that a show a! Tun thlengin a inchhirna thu a la chhak chhuak lo. Ngaihdam dil phei chu khawilamah.
“Zoram Ni” tia sawi tak, Mizoram beih a nih ni 5th March a lo thlen apiang hian rilruah kan pasaltha kalte leh beihtawk nunau pawisawi lote kha lo lang thar leh mawlh teh se.
Hawh u, he kan Zoram tan hian theihtawpin i ding nghet ila, kan hmaa mihuai kaltate kha i hrereng fo zel ang u.