Ngawih chuh anga kan awm mai mai lai hian kan muangsual ang tih a hlauhawm a, thenawm state nena ramri buai nei thei reng kan ni tih hi kan hriatreng a tul hle.
Hun hmasa lamah nasa takin Assam nen kan buai a, silai hial puakin kan lo buai tawh a nih kha. Muangleia kan awm lai hian hetiang hi la thleng thut thut thei reng a ni tih kan hriatreng a tul awm e.
Ramriah hian buaina tenau hi a awm leh thin a, reh thut thei mai a ni pawhin a hriat loh. A chinfel dan tur lam zawk hi kan ngaihtuahna luah rengtu nise a va tha em.
Ramriah hian kan awm vek thei lo a nih pawhin min beltu hnam hlawm thenkhat emawte hi dah thei ila, Mizoram khua leh tui nihna nei, a huhoa awm ngai ang chite hi ramri hnaih lamah hian sawn ila, a tul angin sorkar pawhin vilzui reng bawk se, kan buaina tam tak hi a pumpelh theih a rinawm.
Buaina chhuak lo tura kan inrin reng a tul a, buaina a chhuah lohna tur leh a lo chhuak palh a nih pawhin kan mi leh sate hmanga kan ram chin huai taka kan ven theihna turin sorkar hian ngaihtuahna hmang zel se la, ramri chungchang hi hrerengin, i muthlu lul lovang u.