Aizawl: Sairang Bamboo Factory-a chowkidar hna thawk, Lalramzauva (49) chu relin a chil hlum.
Thu dawn danin, Lalramzauva hi Myanmar mi a ni a, Sairang leh a chhehvelah mi huan enkawlin kum 10 bawr vel a awm tawh a, GOP Bamboo Factory-ah chowkidar-in a awm mek a. Zirtawpni zan tira Sairanga damdawi lei tura a kal chu Inrinni chawhma dar 10 vel khan Railway hnathawkten Sairang Dinthar, Thlanvawng kawn liama rel kawngah a ruang an hmu a. A thawmhnaw hak leh a pianphung atangin a thawhpuiten amah a ni tih an finfiah a ni.
A la chhiat lutuk loh avangin Inrinni zing dar 8 leh dar 9 inkar vela Silchar pan relin a chil nia ngaih a ni.
A chetsualna hi Sairang Dinthar huam chhung a nih avangin Sairang Dinthar Branch YMA-in an buaipui a, kuang pawh an siamsak a. A ruang hi Inrinni khan Sairang PHC-ah endik a ni a, tlaiah Sairang thlanmualah vui a ni.