Aizawl: Centre for Environment and Social Justice (CESJ) chuan Nilaini khan Aizawla Assam Rifles chhuahsan rama thing kih chhunzawn tur an dang.
CESJ hian sorkarin thingkih a tum chhan te nia an tar lan, Bazar bungkawn – Dak inpui inkar Aizawl Spine kawngpui awmsa hi meter 14 a zauh a tum avangin By pass road, Saron Baptist Church atangin Dak Inpui kawngpui meter 14-a zau laih tum avangin leh, Aizawl square (AR damdawi in tlang, opposite Aizawl watch House tlang) siamna tur atan tlang rawt hniam/zawl tum avangin tih te a ni.
CESJ hian Bazar Bungkawn leh Dak Inpui kawng siam an tum hian Aizawl khawpui traffic jam a tidanglam dawnin a hre lo va. Thingkung kih chhiat tur nen a in hen lovin a hria a ni. Hei vang hian thing kita kawngpui siamtu tur PWD te chu kit lova phunsawn tur leh kawngpui laia dah mai turin ngenna an theh lut a. MPCB-ah boruak thianghlim petu thing kit lo tura stay turin an ngen bawk.
CESJ hian kum 2024 khan Urban Forestry lam mithiamte ruaiin research an lo bei tawh a, an hmuhchhuah te chu lehkhabuah siamin January 2025 khan CM-in a tlangzarh sak tawh a ni.
An zirchiannaah hian, “AR ram chhunga thingte hian metric tonne 4830.04 zet carbon a vawng tha mek a, heti ang zat carbon hi a sah huk dawn tihna a ni dawn a. Chumi piah lamah heng thingkung ten a kumtluana atmospheric carbon (boruaka carbon leng vel) an lo tlenfai thin hi an thianfai thei dawn tawhlo tihna a ni,” an ti a. Heng avangin CESJ chuan Aizawl mihringte tan, thing 176 kih tura an chhinchhiahte chu venghim turin a tawp thlengin an tang dawn tih an sawi a, mipuiten thlawp turin an ngen nghal bawk.