Kumin kum tawp lama India-in a thlen tur, BRICS summit-ah Russian President Vladimir Putin-a chu ‘a tel ngei dawn’ tih Russian tual chhung news agency TASS chuan Kremlin thupuangtu, Dmitry Peskov-a sawi a tar lang.
Indiaa BRICS summit vawi 18-na neih hi a ni leh hun tak erawh hriat theih a la ni rih lo.
Kumina India-in BRICS chairman a niha intawh khawma thupui chu ‘Building for Resilience, Innovation, Cooperation and Sustainability’ tih a ni a, hei hian 2025 Rio Summit-a Prime Minister Narendra Modi-a’n a sawi angin mipui ngaih pawimawh leh mihringte ngaih pawimawh hmasak ber a sawi lan atanga chhuak a ni.
India chuan September 9, 2021 khan BRICS Summit vawi 13-na a lo thleng tawh bawk a, ‘BRICS @ 15: Intra-BRICS Cooperation for Continuity, Consolidation and Consensus’ tih thupui hmangin intawh khawm hi neih a ni.
Kremlin thupuangtuin a nemngheh angin BRICS summit hmanga Putin-a’n India a tlawh leh tur hi kum khat chhunga a vawi hnih tlawhna tur a ni dawn a. Russian president hian Prime Minister Modi-a sawmna angin December, 2025 chawlhkar hmasa ber khan India – Russia Annual Summit vawi 23-na chhimin India a lo tlawh tawh a ni.
India a tlawh hmasak hian hruaitu pahnihte chuan India leh Russia inkara a bik tak leh inpawhna pawimawh an neih tihchak lehzual a nih theih nan hma lak zel tha an tih thu an sawi dun.
Russia leh Ukraine indona kal mek chungchang pawh an sawi dun a, Modi-a’n inbiakna leh palai intirh hmanga remna zawnga indo tihtawp a duh thu pawh a sawi.
Hemi tum hian India leh Russia hian lawng chawlhna leh bungraw thawnna lamah thawhhona an ziak a, bungraw thawnna tur kawng nghet leh tha tak siamna kawngah pawh thawhhona thuk zawk siam an remti bawk ni.