Aizawl: Kolasib Additional DC B. Malsawmtluangi hoin district chhunga Inner Line Permit (ILP) dan bawhchhiate chungchang ngaihtuah a ni.
Kolasib Addl DC ho hian Thawhtanni khan DC Conference Hall-ah ILP dan bawhchhiate chungchang leh hmalak zel dan tur relin an thukhawm a. He hunah hian ILP nei lo leh ILP hun tiam pel tawhte dap chhuah leh enfiah an nih theih nan, Police Officer-in-Charge (OC) ten chawlhkar khatah vawikhat tal routine inspection an neih ziah thin thu tar lan a ni a. ILP dan khauh zawka kalpui dan tur leh dan bawhchhia te hremna pek dan tur te uluk taka sawiho a ni.
ILP hmanga hnathawk leh midang rawn lut te lakah hian a latu (sponsors) ten mawhphurhna lian tak an neih thu leh, an mawhphurhna te tha taka hlen chhuak tura beisei an nih thu tar lan a ni a. ILP endik leh dan kengkawh tur hian khawtlang hruaitu village council (VC) leh YMA-te nena thawhho zel dan tur te rel a ni.