Aizawl: Fisheries department leh Central YMA chuan Mizoram luidung nungcha venhim leh humhalh turin thawhhona thuthlung Thawhlehni khan an ziak.
Thawhhona thuthlung hi Fisheries Minister Lalthansanga pisa-ah Fisheries department aiawhin Director Zonuntluangi’n hming a ziak a, Central YMA aiawhin President R. Lalngheta’n hming a ziak a ni.
Fisheries Minister Lalthansanga chuan Fisheries department tan luidung zawng zawng vil a harsat thu sawiin, “Kan rama tlawmngai pawl lian ber YMA ten kan luidung humhalh nachang hria a, branch-ten theihtawpa mahni huam chhungah hma an lo la thin chu a lawmawm hle a ni,” a ti.
Lungrual taka Fisheries Department leh YMA te thawhhona hian rah tha a lo chhuah tawh thin a, kum hnih an thawhho lehna turah hian Fisheries Acts leh Rules hnuaiah awmze nei leh tangkai zawka Mizoram luidung hausakna hman kawngah hma an sawn phah ngei a beisei thu a sawi bawk.
Lui dung humhalh tur hian Fisheries Department leh Central YMA hian kum 2021 atang khan thawhhona thuthlung hi kum hnih atan zel an lo ziak tawh thin a, tunah hian a tum thumna atan thawhhona thuthlung hi an ziak leh a ni. Tunah hian YMA branch 93-in luidung humhalh bik an nei a ni.