Aizawl: Information & Public Relations (I&PR) Director K. Vanlalsangi chuan Thawhlehni khan District Information & Public Relations Office, Lunglei tlawhin, District office dinhmun a enfiah bakah, an mamawh hrang hrang a enpui.
I&PR Director hi District IPRO C. Lalhruaitluanga hovin I&PR-a thawktuten an lo dawngsawng a. Office hmunhma en hovin, office tihchangtlunna tur leh thil pawimawh hrang hrang an sawi ho.
I&PR Director K. Vanlalsangi chuan I&PR Office Lungleia thawktute’n department leh ram tana theih tawp an chhuah thinnaah lawm thu sawiin, thahnem ngai taka thawk zel turin a chah a. Thawktute zingah thawh hona tha chhawm nung zel tur leh office hmunhma leh bungruate chu uluk tak leh tha taka enkawl chhunzawm zel turin a chah bawk.
I&PR Director hian Lunglei Office-a Conference Hall chei that mek chhunzawmna tur sum a hlan nghal.