Aizawl: May ni 12 hi khawvel pum Nurse te ni, International Nurses’ Day a ni. He ni pual hian Trained Nurses’ Association of India (TNAI), Mizoram State Branch chuan Dawrpui Multipurpose Hall-ah hun an hmang.
He International Nurses’ Day puala hun hman hi Minister B Lalchhanzova’n khuallian niin a hmanpui a. Damlo enkawlna kawngah Nurse-te pawimawhna leh hlutna sawiin, Nurse-te thiamna leh uluk taka an enkawlna hnuaiah damlo tam takin damna leh hriselna tha zawk an chan phah thin thu a sawi.
Zirchiannain a tarlan danin, Trained Nurse zaa 10 a an punin damlo thihna (mortality rate) zaa 7 zetin a hniam phah thin tih minister chuan a sawi a. Hei hian damdawi in leh hriselna hmunah nurse thiam tak leh training tha tak nei tam zawk neih a pawimawh zia a nemnghet tih a sawi bawk.
Inkhawmah hian Mizoram hmun hrang hranga thawk nursing professional-te leh zirlai tam tak an tel a. Khuallian Minister B Lalchhanzova’n Nurse-te puala buatsaih First Aid Book a tlangzarh bawk.