Aizawl veng 10-te thli bawlhhlawh luan khawmtirna tura duan, PHE department-in a kalpui mek, ‘Sewerage & Septage Treatment Works for Zone-7, Aizawl City Small Bore Sewer, Tuikual Lui’ chu thawh mek zel niin km 31.41 pipe phum turah km 8.6 phum tawh a ni.
Rs. 37,76,85,198 senna tura ruahman hna hi Ace Alliance Pvt. Ltd., Guwahati, Assam-in an thawk mek a. August 5, 2024 atanga tan niin kum hnih chhung chhunga thawh zawh tur a ni a. Thawh zawh hnuah pawh thawktute hian kum hnih dang, August 5, 2028 thleng an vil zui ang.
Tuikual luia thli luang veng hrang hrang 10 – Chawnpui, Tuikual North, Tuikual South, Dinthar, Dawrpui Vengthar, Vaivakawn, Kanan, Khatla, Dawrpui leh Zarkawt veng hmun thenkhatte thli lak khawmna tur pipe phum hna hi zan dar 9:00 atanga a tuk zing dar 5:00 thleng thawh thin a ni.
Pipe hmang hian ek thlite chu tui dawt hmanga lakhawmin a sawngbawlna hmun tur (treatment plant)-ah lui kawra paih hmain sawngbawl thianghlim tur a ni a. Ek thlite leia thamral emaw, luikawra paih emaw tihbona tur a ni a, soak pit mamawhna tibovin vantlang hriselna atan hmasawnna leh lei min laka himna a nih tel beisei a ni.
Pipe hmang hian septic tank atanga thli lakkhawm hi sorkar ram, MINECO-ah a tihthianghlimna hmun, sewage treatment plant (STP)-a sawngbawl tur a ni a. Thli tihfim tawh hnu hi lei tha leh thil dangah hman tura ruahman a ni.
STP hian ni khatah ek thli litre maktaduai 3.5 a tithianghlim thei dawn a. Septic tank khat tawh, ek paihna tur mumal awm loh vangin he project hnuaiah vek hian ek paihna tur, Faecal Sludge Treatment Plant (FSTP) pawh STP hmunah hian a awm nghal dawn bawk a ni.
Sewerage & Septage Treatment Works for Zone-7, Aizawl City Small Bore Sewer, Tuikual Lui thawh mek hi Inrinni zan khan PHE Minister Prof Lalnilawma chuan a tlawh nghe nghe.