Cockroach Janta Party (CJP) chuan activist Sonam Wangchuk-a’n competitive exam-a thil dik lo awm thin dodalna lantirtu zirlaite thlawp nana tiam chin awm lova chaw nghei a tan hnu lawkah Jantar Mantar-a tui leh inthiarna hmunte an titawp niin an sawi.
CJP dintu, Abhijeet Dipke-a chuan Pathianni khan lungawi loh huaihawtna hmuna mihring mamawh bulpuite chu thuneitute hnena ngen nawn fo mah se tihtawp a nih thu a sawi.
Dipke-a chuan X-ah, “Sonam Wangchuk-a’n chaw nghei a puan hnuah Jantar Mantar-a inthiarna leh tute chu Delhi Police-in an titawp a. Tui lakna leh faina atana tulte ruahmanna siam a ni lo,” tiin a tar lang.
“Ngenna leh Pu Wangchuk-a kum leh hriselna dinhmun sawi fo mah ila police hian engmah an ti duh lo va, mamawh bulpui dang pawh tihtawp a ni dawn niin kan hria a. Police-te hian eng nge an tih?” a ti.
Wangchuk-a hian Pathianni khan Jantar Mantar-ah tiam chin nei lovin chaw nghei a tan a, June 20 atang khan CJP chuan sit-in an lo tan tawh a, Union Education Minister Dharmendra Pradhan-a chu competitive exam-a thil dik lo a awm avangin a bân an phut a, NEET zawhna put ru avanga lungawi lohna pawh a tel.
Zawhna put leh exam nawn buatsaih leh kaihhnawihah zirlai 21 chuang an intihhlum nia sawi a ni a. CJP hian heng mite zahna hlanna atan Jantar Mantar-ah hian hmun an buatsaih nghe nghe.
Wangchuk-a hian kar kal ta tir lam khan sorkarin thil pahnih – education system-a rintlak leh innghah ngamna siam leh Ladakh tana inrelbawlna hran leh khuarel humhalhna tha zawka pakhata tal a tihhlawhtlin loh chuan Pathianni atanga tiam chin nei lova chaw nghei a tan dawn tih a puang.
Thil phut pahnih zinga pakhatah pawh hmalak a nih chuan chaw nghei hi a ti dawn lo tih sawi mah se sorkarin a ngaihsak loh avangin chaw nghei hi a kalpui ta a ni.
Chaw nghei hma hian Wangchuk-a leh Dipke-a te hian Mahatma Gandhi zahna lantir turin Rajghat an tlawh a. Minute hnih chhung ngawi renga zahna hlanin zirlai, thalai, lo neitu hruaitute leh mipui tam takin an tel.
Pathianni vek khan Dipke-a hian Uttar Pradesh, Haryana leh Punjab-a lo neitu hruaitu eng emaw zat chu Delhi-a nawrh huaihawtnaa an tel ve loh nan pawn chhuak thei lova hren (house arrest) an nih thu a sawi bawk.
Inrinni khan Dipke-a hian lungawi loh lantirna hi tun hnaia Maharashtra Teachers Eligibility Test (TET) zawhna put ru nen pawh a inkaihhawih tih a sawi a. Exam chungchanga buaina awm fo chuan competitive exam neihnaah kal dan fel lo a lantir tih a sawi bawk.
Maharashtra sorkar chuan zawhna lehkha thenkhat a put ru nia sawi vangin TET hi a sawn hla a, mi pathum man an ni.
CJP hian ‘Pradhan Go Back’ campaign an kalpui bawk a, zirlai, nu leh pa, zirtirtu leh vantlang pawlte chu zirna lama rintlek a awm theihna tura an thil phut zawm turin an ngen.