Aizawl: MNF chuan Mizotaxi Apps chu lirthei nei ve lo, a hmangtu mipuiten an hman apianga sorkara chhiah an pekna tura ruahmanna a nih avangin sorkar chu sut leh turin an ngen a. Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) MTA, hmalakna chu a tawp thlengin a thlawp dawn tih an sawi.
Hemi chungchangah hian eptu party hian Inrinni khan thuchhuah siamin ZPM sorkar chu mipuiah chhiah chi hrang hrang a tisang chhunzawm kal zelah puhin taxi leh auto rickshaw-te chu Mizotaxi Online Application hman luihtir a tumah an puh a, “MTA, ATTA leh ADAROA ten him tawk lovah ngaiin driver-te chuan chhiah khawntu (collector) atana hman nih an duh lo,” an ti.
Lirtheia ei zawng pawlten transport minister dawa an inbiaknain awmzia a nei thei lo niin an sawi a. “Registration fee Rs. 500 an chawi theuh dawn bakah taxi/auto hmangtu mipuiten an hman apiangin chhiah 6% atanga 10% zel an chawi a ngai dawn a. Mizotaxi Apps hmanga mipuiah chhiah lak tur hi eng dan hmanga lak nge tih pawh hriat a ni lo,” an ti a, hei vang hian an thil tih tum sut leh ngei turin sorkar an ngen tih an sawi.
Sorkar hmalakna chu ZPM sorkar mumal lohzia te, central-a BJP sorkar tlawn chunga sum an sawi chhuah theih ve loh avanga mipui tawrhtirnaah an ngai tih an tar lang bawk.
‘App hi chhiah a ni lo, platform fee atana hman tur’ ti pawh awm se passenger leh driver-ten a hmaa pawisa sen ngaih lohnaah chawi a ngai zel dawn nia sawiin “Hna tul buai tam tak insiam belhna a ni bawk,” an ti a. “App buaipuitu company chu sorkarin ruai lo se engmah sum sen belhna tur a awm lo vang,” an ti.
Mizorama taxi khalhtu eng emaw zat leh passenger eng emaw zat gpay khawih lo leh smart phone la nei lo an awm nia sawiin hei hi chu tuna kan ram dinhmun ni mekah chuan zawh loh nghawngkawl inbahtirna a la ni rihah an ngai tih an sawi.
“Sawrfu leh tur awm tawh chuanglo chhungkaw eng emaw zatin eizawnna turin taxi/auto rickshaw loan hmangin an la a, ei zawn nan an hmang a. Mi rethei zawkte chungah heti taka ZPM sorkarin chhiah khawn belh a tum mek te, a inlulinna leh hleilenna hi MNF chuan tha a ti lo hle a ni,” an ti.
Taxi/auto hmang thinte pawhin dan hi zir chianga tuna ram dinhmun ni mekah hman chi a la nih loh avangin pawm ve lo turin an ngen tih an sawi a. “State dang, phaizawla chengte leh keini tlangram kawng chhengchhe lutuka chengte hi Delhi CM an intehkhin thin ang lo takin patla khata buk chi kan ni lo tih hi sorkarna chelh mektute hian lo hre bawk rawh se,” an ti.