- Thangkhuma (T-a)
Kristian ram pathum USA, Canada leh Mexico-in World Cup an inthlen tawm a, kristianna thil pho lanna leh khelmuala a huhova team tawngtai lai hmuh tur a awm nual mai. Heng zingah hian min dek na bik riau a awm.
Sakuana thil hi Europe khawmualpuia ram changkang tawhten dah nep an tum hle a, a bikin kum zabi 21-na kal chho mekah hian European mi ngohovin mi mal zalenna chawi vawngin an sakhaw vawn thin kristianna an hnuchhawn nasa tawh a, hei vang hian Germany, England, France leh ram changkang dangah pawh muslim an lian chak viau niin a hriat.
2022 World Cup kha muslim ram Qatar-in a thleng a, an sakhaw thurin kalh zawnga chet an khap avangin lungawi lohna thawm a ring a, European mi ngohovin dodalna leh duh lohna an lantir nasa leh zual.
Kum li kal taa thil langsar tak pakhat chu Europe ram hrang hrang zinga hausa ber, kristian ram ni thin leh football-a ram ropui bik Germany team-in neih inang inkawp leh hurna thil kaihhnawiha pianpui nihna tidanglamtute thlawp zawnga an chet dan kha a ni.
LGBTQ+ a thlawp tih lantir nan Germany captain Manuel Neuer-a’n chhimbal rawnga chei captain banbun hren a uar a, Qatar World Cup-ah kha chuan FIFA-in hren a khap tlat. Chuti chungin Neuer-a hovin LGBTQ+ an thlawpzia lantir nan Germany team-a player-ten hmui hup vekin thla an la ho a, a darh zui viau nghe nghe!
Tun World Cup-ah erawh African thalbe atanga zi chhuak, pa lian pahnihin Germany team lan dan an her danglam. Hun rei tak atangin kristiannain an ram team a nghawng na ngai tawh lo viau a, mahse, Felix Nmecha leh Jonathan Tah chuan vawi nga world champion an nih theih nan Pathian tanpuina an dil a, kristian dik tak an nihzia tlangaupuiin Isua ringtu an ni tih chetziain an lantir.
Germany team atanga hetiang mi an awm hi hun eng emaw chen kal tawh atanga chhutin thil mak ang reng tak a tling ve tlat. A bikin kum 25 mi Nmecha phei hi chu rinna kawngah a kal na leh zual a, tun World Cup-ah Germany tan goal khung hmasa ber a ni nghe nghe.
7-1-a Curacao an hneh tum khan feet 6 leh inchi 3-a sang Borussia Dortmund midfielder hian a pet lut a; Thupuan 4:10 behchhanin a goal thun a lawm a, chetziain lalthutphah hmaa lallukhum a dah lai a lantir a ni.
World Cup-a tel thei ram te ber nen an inkhelh zawhin khelmual laiah Nmecha leh Bayern Munich centre-back Tah chuan Curacao team zawmin an tawngtai ho a; a hnuah Germany hian 2-1-in Ivory Coast an hneh leh a, khelmualah Nmecha leh Tah an tawngtai dun leh.
Nmecha hi a pa Nigerian, a nu German a ni a, German khawpui lian zinga mi Hamburg-ah piangin kum sarih a nih laiin England-ah chhungkuain an pem. Manchester City academy atangin a inzir chhuak a, England leh Germany tan kum bithliah inelnaah a khel ve ve a, March 16, 2023 khan Germany senior team kohna dawngin ram tan vawi 10 a inkhelh tawh atangin goal hnih a thun a ni.
Kristian rinna vuantu a nih avangin Nmecha hian na takin neih inang inkawp leh mahni nihna tidanglamtute a dodal tih social media-ah a tar lang thin a, hei vang hian a football zin kawngah beih a tawh phah.
July 2023 khan Dortmund-in Wolfsburg atangin lak luh an tum a, Dortmund tantute chuan LGBTQ+ dodaltu a nih avangin an duh lo a, an duh lo satliah lo viau leh nghal. German football huang chhungah club-in anmahni tantu mipui an ngaih pawimawhzia ngaihtuahin thil pawi tak a tling.
Mahse, club hotu lamin an duh em avangin mipui beng daih tumin hma an la a, an la lut lui. Nmecha hian khelmualah hnuhma nei zuiin amah duh lotu Dortmund tantute a tilawm a, thiamna, tharum leh thahrui tha tak a neih avangin Germany head coach la naupang tak Julian Nagelsmann chuan kovin, rinrawlah a hmang a, team tan a thawh hlawk.
Nmecha chuan : “Kristian chhungkuaa piang ka ni a, ka puitlin thlengin ka sei lenpui a, mite hnenah kristian ka ni tih ka sawi thin. Chutih rualin kum 14, 15 vel ka nih laiin kristian sakhaw zuitu mai ni lovin Isua Krista ring tlat turin inhlanna tak tak ka nei a, min siamtu Pathian nen engtiang taka nasain nge inzawmna kan neih tih ka hre chiang a ni.
“Kum tinin rinna kawngah ka thang lian ve zel a. Pathian nena kan inzawmna a nghet telh telh a, rinna awmzia leh thutak hriat belh zelin nun kawng dik ka zir chhuak tam deuh deuh a, ka rinna tichak sauh sauh tura ke pen dan ka thiam tial tial bawk. Chiang taka ka sawi duh chu ka rinna leh Pathian nen kan inzawmna hi ka hlimna bulpui ber a ni,” a ti.
Nmecha chuan a tum ber sawiin, ‘a nasa thei ang bera Isua chawimawina leh zahna lantir a duh a,’ professional footballer a nih avanga sum tam tham a hmuhte chu Pathian malsawmna a ni a, sum ringawt buaipui erawh thil hlauhawm tak a nih thu a sawi.
Germany midfielder hian Curaçao laka goal a thun hnua a chet dan sawi fiahin, thilpek zawng zawng, hnehna zawng zawng, hun hlu leh ropui kan tawn zawng zawng hi Isua vanga kan neih vek a ni tih lantirna a ni, a ti.
Germany team chhungah feet 6 leh inchi 5-a sang Tah nen rinna kawngah an inthurual thei a, Hamburg-ah piang ve vein kum ngain Bayern Munich defender a upa zawk. Kum 30 mi Tah hi a pa Ivorian ni ve thungin a nu German a ni a, Ivory Coast an hneh hnuah Nmecha nen urhsun taka khelmuala an tawngtai dun rualin Pathian an dah pawimawh hmasakzia mipui hmuhtir an duh.
Tah chuan ‘hmangaihna, mi dangte khawngaihna, remna leh lawmna’ lantirna a ni tih a sawi rualin, ‘football-in minute 90 chhung mipui min hruai khawm thei mai thei, Isua Kristaah erawh chatuanin mipui kan inrem thei a ni,’ a ti.
Bayer Leverkusen-ah hlawhtling taka hun a hman hnuah German team hlawhtling ber Bayern a zawm a, ram tan vawi 49 khel tawhin goal khat a thun.
“Captain America” tia hming lem an phuahsak Christian Pulisic chuan kristian a nihna langsar takin a tlangaupui bawk a, USA team chhungah zah kai a ni a; US-in player mal mai ni lovin team pum puia Pathian biak an ngai pawimawh.
Kristian ramah an inkhel bawk a, team hrang hrangin kristianna an lantir hlawm. Chuti chungin ngaih pawimawh bera sakhuana thil nei ngai tawh mang lo Germany team chhungah Nmecha leh Tah an awm tlat hi kristiante tan chuan chanchin tha leh lawmawm em em a ni lo thei lo.