Aizawl: Congress party chuan Thawhlehni khan Congress Bhavana Golden Hall-ah Remna Ni an hmang a, an president, Lal Thanzara chuan remna leh muanna a awm theihna atana hmalak a nih lai khan India-ah Congress sorkar lo se hetiang hun hi hman a nih a rinawm loh tih a sawi.
MPCC president chuan Morarji Desaia te, eptu hotute kha chuan Mizoram mipuite chu uihum lek an ni a, man khawma hmun hrang hrangah dah darh vek an ti niin a sawi a. “Mahse, Indira Gandhi, Buta Singh leh INC hruaitute avang khan inbiakna neih theih a ni zawk,” a ti.
Lal Thanzara chuan khatihlai khan Mizoramah Lal Thanhawla kaihhruai sorkar lo se chuan remna leh muanna a thlen a beiseiawm loh niin a sawi bawk a. “Mizo mipui tawngtaina, kohhran hruaitute hmalakna, pawl, zirlai leh party te hmalakna avangin remna leh muanna nei a ni,” a ti.
Thusawitu dang, MPCC Secretary DR Zirliana, zalenna suala lo rammu tawh chuan India chanchin sawi dawn chuan Congress tel lovin a sawi theih loh va, India ramin sapho awpna atanga zalenna a hmuh dan sawi dawn chuan Congress tel lovin a sawi theih loh va, chutiang chiah chuan Mizorama remna leh muanna chungchang sawi dawn chuan Mizoram Congress leh a hruaitute tel lo chuan sawi theih a nih loh thu a sawi.
Political party dang te, kohhran te, Zirlai pawlte leh YMA lamte pawhin remna leh muanna atan an bei ang a, mahse, an bei a ni mai a, remna atana inbiak nan te hmasawnna tak tak leh a lo thlen tak dante sawi dawn chuan Congress leh hruaitute hming lam lo chuan a sawi theih loh niin a sawi bawk.