Khelo India Scheme-a pawisa ruahman thin dan siam thain sorkar laipui chuan kum nga ruahmanna chhunga infiamna hmunhma hmasawnna project-ah state-te chanpual atan Rs. vaibelchhe 565 a dah hrang.
Kar kalta chhoah khan union cabinet chuan Khelo India Scheme atan hian Rs. vaibelchhe 29,054 ruahmanin Assistance to National Sports Federations Scheme (ANSF) atan Rs. vaibelchhe 7,387 a pawmpui bawk.
Khelo India Scheme pawisa hman dan thil chipchiar tar langin sports ministry chuan he scheme huanga pawisa awm atang hian sorkar laipui chan tur chu Rs. vaibelchhe 28,489 a nih laiin state-te chan tur zat chu Rs. vaibelchhe 565 a ni tih a sawi a. Ministry hian state tinte hnenah eng zat chiah nge an pek dawn tih erawh chipchiar takin a tar lang rih lo.
Scheme hman dan tur tharah hian state liante tana hmunhma siamnaa sorkar laipui leh state tê pawisa thawh tur zat chhut dan chu 60:40 a ni ang a, zaa 60 hi sorkar laipuiin a tum ang.
Hmarchhak state -Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura te leh Himalayan state – Himachal Pradesh leh Uttarakhand te tan erawh sorkar laipui hian he senso atanga 90% a tumsak dawn a ni.
Union territory – Andaman & Nicobar Islands, Chandigarh, Dadra & Nagar Haveli leh Daman & Diu, Delhi, Jammu & Kashmir, Ladakh, Lakshadweep leh Puducherry te tana infiamna hmunhma hmasawnna erawh sorkar laipui hian a vaiin a tumsak thung ang.
“Hetianga then darh hi Khelo India Scheme hmasah khan a awm ngai lo va, hetianga siam a nih chhan hi state-te hnathawhah hian thawhpuia siamin project hi anmahni pual anga a ngaihtir nan a ni,” tiin sports ministry official pakhat chuan a sawi.
Pawisa ruahman thar hi a hmaa Khelo India Scheme puala pawisa ruahman thin ai khan a let riat zeta tam a ni a. A hma kha chuan sorkar laipui hian a pum puiin pawisa a tum a, state tan pawisa hranpa dah a ni lo.