Chawlhkar hnih lo awm leh tur chhungin India-a fur ruah sur chu khawthlang, ram laili leh chhim lamah a nih dan thin pangngai aiin a tlem dawn tih sawi lawk a ni a, hei hian lai, bekang, vaimim leh be lam chi chin tan mek a tibuai lehzual hlauhna a siam.
India-a kumtluana ruah sur thin zinga 70% chuang hi fur laia sur a ni a, ram economy $ vaibelchhe 40,000 chuang innghahna pawimawh tak a tling a. Mi cheng zahve aia tam hi lo neia ei zawng niin an zinga a zahve dawn hi tui lakna mumal an neih loh avangin fur ruah hi an innghahna a ni.
India Meteorological Department (IMD)-a hotui lian chuan chawlhkar hnih lo awm leh tur chhung hian khawchhak leh hmar lam state tih loh India hmun dang zawngah chuan ruah a tlem dawn tih an sawi lawk.
“Khawthlang leh chhim lam state-ah a tlem zual dawn a ni,” tiin a sawi bawk.
June 1 atanga intan kumin furah hian India-ah ruah a sur tlem sa hrim hrim a, tun thlengin tun ang huna a dawn thin ang a phak lohna chu 12% vel a ni a. Andhra Pradesh chhim lam telin state thenkhat phei chuan kum danga an dawn zat an phak lohna hi 34% zette a ni.
El Nino insiam chak zel avangin tun thla tawp lam hian ruah a sur tlem phah dawn niin weather department-a hotu dang pakhat chuan a sawi bawk.
“Chawlhkar hnih lo awm leh tur chhung hian khaw vawh lai ber leh lum lai ber chu a nih dan thin pangngai aiin a sang zawk hmel bawk,” a ti.
Lo neitute chuan July thlaa an dawn thin pangngai ang thuak ruah dawnga lei a hnawn tak avangin tun lai hian nipuia chin chi thlai – bekang, la, vaimim, be leh buh lam chi an ching mek.
Thlai chin tharte hian leiah zung an la kaih nghet tawk lo hlawm a, khua a ro rei leh deuh chuan chhia leh thi an awm phah teuh dawn Mumbai-a khawvel huapa sumdawnnaa dealer chuan a sawi.
August 7 thleng khan lo neitute hian nipuia chin chi thlai ram hectare maktaduai 96.8-a zauvah an ching tawh a, nikum tun ang hun aiin 2% dawnin an ching zim niin agriculture & farmers’ welfare ministry chuan a tar lang a ni.