Mizo Zirlai Pawl (MZP)-in Mizoram Public Service Commission (MPSC) siamthat hnatlang an huaihawt kal zelah sorkarin MPSC Reform Committee din an tiam ni la laa official order a chhuah tak avangin thawktute pisa kai tur dan an titawp nghal.
Nilaini chhun dar 1 khan Chief Secretary Conference Room-ah DP&AR Secretary Udit Prakash Rai-a kaihhruainain MPSC thuneitute, MZP hruaitute leh MPSC-a harsatna tawk zirlai aiawhte chu an inkawm.
Inkawmnaah hian DP&AR secretary chuan Mizoram sorkarin MPSC Reform Committee a din dawn thu leh hei hi chief minister hnenah thlen a nih tawh thu a sawi.
MZP hruaitute leh MPSC-a harsatna tawk zirlaite chuan buaina hrang hrang chin fel nan ni hnih chhung peaceful protest an neih leh ni thum chhung MPSC pisa kai tur an dan hnuah sorkar aiawhte nen an inkawm ta hi lawmawm an tih thu an sawi.
MPSC Reform Committee dinna hi official order-a a chhuah hma chuan Ningani zing dar 9 atangin MPSC pisa kai tur chu an dan chhunzawm zel rih dawn thu an sawi hnu lawkah sorkarin MZP-in ‘MPSC Reform Commission/Committee din rawh se’ tia ngenna angin DP&AR changtu, chief minister-in Committee to review the recruitment framework and process for public recruitment in the Government of Mizoram tia dinin MPSC siam that hnatlang a koh chu order a chhuah tak avangin pisa kai dan a hmalak mekna chu a titawp ta a ni.