Aizawl: Union Home Minister Amit Shah-a’n Lok Sabha Monsoon Session-a Foreign Contribution (Regulation) Amendment Bill, 2026 (FCRA) chu member 31 awmna, Joint Committee of Parliament (JCP) endik hmasak tura a thehlut chu ZPM General Headquarters chuan Mizoram sorkar leh kohhran hmalakna a ni tiin lawmthu an sawi.
ZPM Media & Publicity Department-in thu an chhuah danin, Chief Minister Lalduhoma leh Mizoram kohhran hruaitu pawl pahnih — Council of Churches in Mizoram (CCM) leh Mizoram Kohhran Hruaitute Committee (MKHC) te chuan he Bill hi JCP kuta dah a nih ngei theih nan theihtawp an chhuah a. Mizoram sorkar hian Pathianni kalta (August 9) khan social media X kaltlangin sorkar laipui hnenah ngenna hi a thawn nawn bawk.
He hmalakna hian hlawhtlinna a hmuh tak avangin ZPM chuan sorkar, mipui leh kohhran te thawhhona rah tha a nih thu tar langin, chhinchhiahtlak an tih thu sawiin, Union Home Minister Amit Shah-a inpekna chu lawmawm an tih thu an sawi.
FCRA Bill 2026 chik taka zirchiangtu tur JCP-ah hian Lok Sabha member 21 leh Rajya Sabha member 10, an vaiin member 31 an awm dawn a ni. Tun hnai, August 6, 2026 khan Chief Minister Lalduhoma leh CCM/MKHC aiawhte hian New Delhi-ah Home Minister hi inhmukhawmpuiin memorandum an lo thehlut tawh a ni.
Hetihlai hian, ZPM chuan sorkar laipui leh Kohhran inkara hmalakna pawimawh tak a awm chhung hian NDA zawmpui MNF pawl chu thawm a nei lo hle nia sawiin, Mizoram atanga sorkar laipui zawmpui ber hmalakna langtham an nei lo chu demawm an tih thu an tar lang tel bawk.