Aizawl: Mizoram Pradesh Congress Committee (MPCC) hotu lian pathum — Sr. Vice President Lalnunmawia Chuaungo, Vice President C. Ngunlianchunga leh Vice President Zodintluanga Ralte te chuan Hrangturzo assembly constituency chhunga Bawktlang, Leng, Sailulak leh East Lungdar khuate tlawhin bial fan hna an chhunzawm.
Ningania heng khuate an tlawhnaa MPCC Sr. Vice President Lalnunmawia Chuaungo chuan ZPM sorkar chu mipuiah chhiah hrang hrang leh electric bill tam tak khawn mah se, kawngpui tha leh eng duhtawk pawh mipuiin an hmuh loh thu a sawi. Gujarat sorkara a thawh laia power sector atanga sum lak luh dan tawnhriat a neih te sawiin, Mizoramah pawh ruahmanna fel tak awm se electric hmangin sum tam tak thawh chhuah theih a nih tur thu a sawi.
MPCC Vice President C. Ngunlianchunga pawhin thu sawiin, Congress Party chu kum 2028-a sorkar leh tur leh NLUP changtlung zawk hmanga mirethei khaichhuak tura inpumkhat taka an inbuatsaih mek thu a sawi a.
MNF hotu lian te inhruipawhna avangin thuang hniha then an nih thu sawiin, ZPM sorkar chhungah pawh Chief Minister leh Home Minister te inkar inhruipawh a nasat thu leh leh department portfolio inchhuhsakna a thlen avangin mipuite leh officer-ten an tuar mek, a ti a. Sorkar kalphung fel lo leh mipui pawisak lohna avangin ZPM hi sorkar rawngbawltu tling lo a ni tiin a sawi bawk.
MPCC Vice President Zodintluanga Ralte chuan ZPM chu inthlan campaign laia sorkar kal tawhte sawisel vak vaka puhin, tunah hian kum thum dawn an lo sorkar ve ta a. Ram tana hmasawnna rotling an thawh sawi tur ala awm lo va. CM Lalduhoma chuan a hun tha zawng zawng insawifiahna atan a hmang tih sawiin, Lalduhoma chu Mizoram chief minister lo ni tawh zawng zawng zinga dawtsawi hrat ber a ni a. A thusawi hian tunah amah a vaw let mek a ni, tiin, ZPM sorkar chu term khat bak an sorkar zui dawn lova tih a sawi bawk.