Hungary khawchhak lama kawngpuiah Pathianni khaw var hma khan Polish bus chesualin a chuang mi 12 vel thi an awm a, mi 10-in hliam an awm bawk niin Pathianni tuk khan Hungarian Prime Minister Peter Magyar-a’n Facebook-ah a tar lang.
Bus hi Mezokeresztes khaw bulah kawng sir awihtlanah tlan lutin a let niin police chuan an sawi a, Nyiregyhaza pana a tlan laiin zing dar 1:00 (India-a zing dar 4:30) vela tawhsual hi tawk an ni tih an sawi bawk.
Sorkar news agency MTI chuan passenger 57 leh a khalhtu pahnih an chuang niin a tar lang a. Thlalak an tihchhuahah bus sen chhe tak kawng sira let langin a tukverh darthlalangte a keh nasa hle a, a bul velah a chuangte suitcase ni ngeia lang a darh nasa hle bawk.
“Polish-register bus hian M3 motorway zawhin Nyiregyhaza khawpui an pan a… kawng ngil tha laiah a sira awih tlanah tlan lutin a let zui ta a. Hriat theih chinah a khalhtu hi a mutthlu a nih hmel hle,” tiin police chuan an website-ah an tar lang.
Emergency services chuan crane thlen hmain tonne 24-a rit bus chhung leh a hnuaia tangte lak chhuah tumin chawi sawn an tum niin MTI chuan a tar lang a. Crane thlen hnuah kawngpuiah an hnuk chhuak tawh bawk.
Hungary-a ambulance service chuan hliam zinga pakhat chu a nunna atana hlauhawm khawp hliam nei a nih thu leh mi pakua pawh na deuh hlek an ni tih an sawi a. Mi dang 37 erawh hliam tenau deuh chauh nei niin an sawi.
Polish President Karol Nawrocki-i chuan, “Hungary-ah Police bus a chesual tih hriatin a lungchhiat tak zet a, kan hnampui tam tak an thi bawk a ni,” tiin X-ah a tar lang.
Hungarian Prime Minister Magyar-a pawhin an rama chhiatna thleng pawh a tih thu leh hliam tuarte pawh rang taka dam leh turin duhsakna a hlan.
Police chuan bus khalhtu hi an la tih an sawi a. Hliam tuarte chu damdawi inah lak an ni bawk tih an sawi.
Polish Foreign Minister Radoslaw Sikorski chuan X-ah bus chesualah hian an thenawm rama an consular an che chhuak nghal tih X-ah a tar lang a. “Hungarian thuneitute nen pawh kan inbia a, foreign affairs ministry-in kan hriat ang thil chiangte kan puang zel dawn a ni,” a ti.