Aizawl: Mizoram Scholarship Board chuan post-matric scholarship sem hna a thawk mek a, tun thlengin a dil za zela 93 (93%) hnenah sem zawh a ni tawh a. La dawng lote hi bank account-a Aadhaar Seeding (DBT direct benefit transfer) tifel lote an ni hlawm a, hma la thuai tura ngen an ni a. Hetih rual hian pre-matric scholarship pawh tun kar hian sem tan theih beisei a ni bawk.
August 14, 2026 khan Mizo Zirlai Pawl (MZP) hruaitute chuan Mizoram Scholarship Board Secretary, Dr. C. Laldawngliana chu a pisaah kawmin, post leh pre-matric Scholarship sem dan tur bakah zirlaiten awlsam zawka dilna an siam theih dan tur te an sawiho a.
Board secretary chuan bank-a Aadhaar seeding tifel thar te pawhin National Scholarship Portal (NSP) lam atanga validate a ngai leh thin avangin, sum hi a lut nghal mai thei lo va, ni 15 tal nghah a ngaih thin avangin hrethiam taka lo nghak turin zirlaite a ngen.
Pre-matric scholarship chungchangah sorkar laipui atangin ‘Mother Sanction’ hmuh fel tawh a ni a, state matching share (SMS) finance department atanga nghah mek a ni a. Buaina a awm loh chuan tun kar chhoa sem a nih beisei a ni a, pre-matric diltu zawng zawngte pawh bank-a Aadhaar seeding lo tifel vek turin Scholarship Board chuan a chah a ni.