August ni 16 kha Bollywood lemchanthiam Saif Ali Khan piancham niin, a nupui chuan an thlalak hrang hrang social media lamah a dahchhuak a, lawm a hlawhin, an inhmangaihna a vul zual zel tih a lang chiang hle.
Kum 56 mi ni ve tawh Saif Ali Khan hian a nupui thlalak hrang hrangte hi a hriatpui a, a nupui Kareena Kapoor chuan kan tana pa tha ber, engkima chhungkaw khaidingtu tiin a pasal piancham hi a lawmpui a ni.
An nupa thlalak thar lam tak takte hi hmuh tur a vangin, mahni kalna kawng lamah buai takin an kaldun nasa a, fans lam pawhin beisei nei takin an thlalak zawng thin mah se, hmuh tur a vang thei hle.
Tuna Saif-a piancham puala a nupuiin thlalak a dahchhuahte hi a la thar lam hle tih a hriat theih a, tunhnaia chawlh an hmanna hmun hrang hranga an lak ni ngeiin a lang a, fans te lawm pawh a hlawh hle a ni.
An nupa hian kum 2008 a Tashan movie an chan dun atanga inhre tan leh inngaina tan niin, a hmain Saif hi Amrita Singh nen lo innei tawhin, fa pahnih – Sara Ali Khan leh Ibrahim Ali Khan te an nei a ni. Kareena Kapoor nen hian October 16, 2012 khan Mumbai-ah innei lehin, a fa hmasa ber Taimur Ali Khan chu December 2016 khan neiin, February 2021 khan an fa pahnihna Jeh Ali Khan an nei leh bawk a ni.