Aizawl: Excise & Narcotics Department-a Direct Recruitment hmanga lâk thar inspector, sub-inspector leh constable-te pualin Thawhlehni khan Police Training School (PTS), Thenzawl-ah thla ruk chhung awh tur Basic Course Training hawn a ni.
Hei hi PTS Thenzawl-a Police Department pawn lam department tana basic training vawikhat buatsaihna a ni.
Hawnna inkhawm hi PTS Vice Principal Zomuanpuii, MPS-in a kaihruai a, Excise & Narcotics Department lak thar mi 33-te bakah IGP (Training & Crime) Meghna Yadav, IPS, Excise Secretary C. Lalruaia, MPS leh Excise Commissioner Z. Lalhmangaiha-te pawh an tel a ni.
PTS Principal Lalthakima, MPS chuan Department pahnihte chu unau hnathawh inang nei an nih thu leh thawhhona tichak tura training hmun khata neih chu lawmawm a tih thu a sawi a. IGP Meghna Yadav leh Secretary C. Lalruaia te pawhin recruit-te chu discipline, integrity leh professional conduct vawng tlat turin an fuih bawk.
Thla ruk chhung hian recruit-te chu ram dan, zirlai pawimawh, taksa hriselna leh inthununna hrang hrang lakah rilru leh taksa buatsaih an ni dawn a, he thawhhona rahbi hriatrengna atan hian hruaituten PTS Thenzawlah thingkung par chi pathum — Thlado, April Par leh Makpazangkang te an phun nghal bawk.