India ramin infiam mite chawimawina sang a semchhuak leh dawn. Arjuna award dawng turin mizo nula Lalremsiami Hmar thlan a ni a, mizo zinga he chawimawina dawng hmasa ber tur a ni.
Infiamna kawng hrang hrangah mizote hi kan duai lo a, kan theihna a sang a, vai ngalria kan tihte zingah pawh kan filawr leh lak thin.
India nulate zinga hockey khel thiam leh langsar, ram aiawha vawi tam lo fehchhuak tawh Remsiami’n chawimawina sang a dawng tur hi a fakawm a, a phu a, mizote hming a titha lehzual bawk. He lawmman hian pawisa fai cheng nuai 15 a la keng tel zui!
Ngun taka ngaihtuah ngai chu, mizote hi kan duai lo a, ruihhloin nasa taka kan ram a run a, kan thalaite tam tak a bawhbuai lai hian a titha peih leh a insum thei tan chuan kawng a la awm a, hlawhtlinna hi kan ban phakah a la awm reng tih hriatreng tur a ni.
Remsiami a fakawm a, a insum thei a, ram aiawha ram hrang hranga a zinnaah pawh Bible a keng a, a chhiar a, a lehkhabu hmuh theih ang ang nasa takin a chhiar thin bawk. A tan ruihhlo ngaihtuah hman a ni lo a, chu chu a hlawhtlinna kailawn pakhat a ni bawk.
Thalaite min cho phurtu, naupang zawkte entawn nise la, kan tihthat duh phawt chuan infiamna kawngah hian kan hlawhtling thei tih inhria ila, Remsiami nun atang hian thalaite i inhmuchhuak thar hlawm ang u.