Aizawl: Impact Study Committee on Kaladan Multi-Modal Transit Transport Project (KMMTTP) & Railway Link between Bairabi & Sairang-te chuan Nilaini khan Chief Minister Lalduhoma hnenah an zirchianna final draft report an thehlut.
Chief Minister chuan thla 12 chhunga report thehlut tura ruahman a nih laia, thla 10 chhunga an inpeih thei chu lawmawm a tih thu leh sorkarin a bawhzui kawngah committee-te thawhpuina a la mamawh zui zel dawn thu a sawi a ni.
Report sawihona neih chhunzawmah Mizoram leh Myanmar ri-a insumdawn tawnna kal dan leh sorkarin dan anga chhiah a lak theih dan turte, Mizoram tharchhuah hlawk zawka thawn chhuah dan turte sawi a ni. KMMTTP hi kum 2027-a hawn a nih tura beisei a nih avangin hmalakna chak zawk a tul thu leh Zochachhuah leh Salachhuah lama sumdawngten godown an mamawh hle thu tar lan a ni bawk.
Rel service chungchangah Mizorama rel a luh hnua a nghawng an zirna atangin ILP tha taka kenkawh a tul thu leh rel station tinte approach road tha tak neih a pawimawh thu an sawi. Sairang leh Aizawl inkar taxi chuan man a to em avanga mi tam takin rel an chhawr tangkai tawk loh thu pawh tar lan a ni.
Chairman T. Lalhlimpuia, MLA kaihhruainaa he committee hian Arunachal Pradesh, Nagaland leh West Bengal-te tlawhin zirchianna an nei a ni.