Aizawl: Govt. Gospel Centenary High School provincialise leh Lumpsum Special Category – II a hlankai tak West Phaileng Higher Secondary School lawmna ‘Upgradation Celebration Programme’ a hmanpuinaah Education Minister Dr. Vanlalthlana chuan, a bial chhunga high school pakhat provincialise a nih avanga amah beitute chu he sikul chanchin hre chiangtu, a bial chhunga mipui rilru tina mai mai an nih thu a sawi.
Ningania West Phailenga Dinthar Community Hall-a MZP buatsaiha a lawmna hunah a bial chhung, Aizawl North II-a High School pakhat provincialise chungchanga tun hnaia an puhna sawi fiahin education minister chuan, a hma chuan he sikul hian zirlai 10 chauh an nei a, lei min avanga an sawn hnuah a bang dap leh a chhuat lei ringin khawtlangin an sa chawp a, zirlai pawh an kal tha duh lo niin a sawi a. ZPM sorkar a din hnuah Ministry of Tribal Affairs puihna, khawtlang tanrualna leh MLA Fund hmangin building tha tak, chhawng hnih sak a nih bakah smart board-te neih tir a nih hnua zirlai pawh 61 lai an awm chhoh tak avanga provincialise ta a nih thu a sawi.
Minister chuan tun hnaiah school-ah te surprise checking a kalpui thin thu sawiin, thla khat chhungin school pariat a tlawh tawh thu a sawi a. Heng a hmun a tlawhnaah te hian an tihdik loh hailansak tura kal ni lo vin, zirlai leh zirtirtute fuih tura kal a nih thu a sawi bawk.